राजूर | नगर सह्याद्री
भंडारदरा पाणलोट क्षेत्रात झालेल्या ढगफुटीसदृश अतिवृष्टीमुळे कळसूबाई शिखराजवळ मोठी दरड कोसळली असून पांजरे परिसरातील ३० ते ४० एकर भातशेती गाडली गेली आहे. ओढ्यांनी मार्ग बदलल्याने गांगडवाडीतील घरांमध्ये गाळयुक्त पाणी शिरले आहे.
दरम्यान, भंडारदरा धरण भरण्याच्या मार्गावर असून प्रवरा नदीत १० हजार युसेसपर्यंत विसर्ग सोडण्यात आला आहे. पांजरे गावाजवळील कळसूबाई शिखराजवळील डोंगराची दरड कोसळण्याचा प्रकार शुक्रवारी सकाळी साडेपाच वाजण्याच्या सुमारास घडला. या घटनेमुळे डोंगरावरील झाडे उन्मळून थेट ओढ्यातून वाहत पांजरे परिसरात आली. दरडीच्या दगडगोट्यांमुळे ओढ्यांनी मार्ग बदलला, तर अनेक शेतकर्यांचे शेतीचे बांध फुटून भातशेती वाहून गेली आहे.
ही घटना महसूल विभागाला कळवल्यानंतर तात्काळ प्रशासन घटनास्थळी दाखल झाले. वन्यजीव विभाग, पोलीस प्रशासन, महसूल विभाग व सार्वजनिक बांधकाम विभाग यांनी या घटनेची पाहणी केली. गेल्या तीन ते चार दिवसांपासून भंडारदरा धरणाच्या पाणलोटात अतिवृष्टी होत असल्याने भंडारदरा धरण भरण्याच्या मार्गावर आहे. भंडारदरा धरणाचा पाणीसाठा शनिवारी सकाळी सहा वाजता १० हजार ००१ दलघफूट झाला असून धरणाच्या सांडव्यामधून नऊ हजार ६२८ युसेसने विसर्ग प्रवरा नदीमध्ये सोडला जात आहे. गेल्या २४ तासांत भंडारदरा येथे १०९ मिमी, पांजरे १८९ मिमी, घाटघर १९५ मिमी, रतनवाडी १५५ मिमी तर वाकी येथे १२२ मिमी पाऊस झाला. निळवंडे धरणामध्ये भंडारदरा धरणामुळे पाणी विसर्जित होत असल्याने धरण ७८.७४ टक्के भरले असून धरणाचा पाणीसाठा सहा हजार ५६३ दलघफूट झाला आहे.
