सुपा परिसरात राजकीय वातावरण रंगले!
सुपा | नगर सह्याद्री
राहुरी-नगर-पाथर्डी विधानसभा मतदारसंघातील पोटनिवडणुकीचा निकाल ४ मे रोजी लागणार आहे. निकालापूर्वीच मतदार संघासह अहिल्यानगर -पुणे महामार्गावर महायुतीचे उमेदवार अक्षय कर्डीले यांच्या अभिनंदनाचे फ्लेस लागले आहेत.
सुपा येथील सुखदेव पवार, राहुल पवार यांनी लावलेल्या या अभिनंदनाच्या बोर्डांमुळे कार्यकर्त्यांचा उत्साह आणि आत्मविश्वास स्पष्टपणे दिसून येतो. आमदार अक्षय कर्डिले यांचे हार्दिक अभिनंदन अशा आशयाचे फ्लेस हे केवळ शुभेच्छा नसून, त्यांच्या विजयाबाबतची खात्री आणि पाठिंबा दर्शवणारे प्रतीक ठरले आहेत.
अजून अधिकृत निकाल जाहीर व्हायचा असताना अशा प्रकारे अभिनंदनाची सुरुवात झाली आहे. समर्थकांच्या मनातील विश्वास किती दृढ आहे, हेच यातून दिसते. सुपा परिसरात या फ्लेसची चांगलीच चर्चा सुरू असून, काही जण याला कार्यकर्त्यांचा अतिउत्साह म्हणत आहेत, तर काहीजण यामध्ये निष्ठा आणि जिव्हाळा पाहत आहेत.
आता सर्वांचे लक्ष अंतिम निकालाकडे लागले आहे. मात्र तोपर्यंत सुपा येथील हे अभिनंदन फ्लेस चर्चेचा केंद्रबिंदू ठरले आहेत.
