अहिल्यानगर / नगर सह्याद्री –
शहरातील सुरू असलेल्या विविध विकासकामांना गती देण्यासाठी खासदार डॉ. सुजय विखे पाटील यांनी प्रत्यक्ष स्थळी भेट देत पाहणी केली. यामध्ये सह्याद्री चौक ते सनफार्मा चौक दरम्यान उभारण्यात येत असलेल्या महत्त्वाच्या उड्डाणपुलाच्या कामाचा त्यांनी सखोल आढावा घेतला.
या पाहणीदरम्यान संबंधित अधिकारी व अभियंत्यांशी चर्चा करत डॉ. विखे पाटील यांनी उड्डाणपुलाच्या बांधकामाची सद्यस्थिती, कामाचा वेग तसेच गुणवत्तेबाबत माहिती घेतली. प्रकल्प नियोजित वेळेत पूर्ण व्हावा आणि काम दर्जेदार पद्धतीने व्हावे, यासाठी त्यांनी आवश्यक त्या सूचना दिल्या.
शहरातील वाढती वाहतूक कोंडी लक्षात घेता हा उड्डाणपूल अत्यंत महत्त्वाचा ठरणार आहे. या प्रकल्पामुळे नागरिकांना वाहतुकीतून दिलासा मिळणार असून, प्रवास अधिक सुलभ आणि जलद होण्यास मदत होणार आहे.
दरम्यान, शहराच्या सर्वांगीण विकासासाठी अशा पायाभूत सुविधांच्या कामांना प्राधान्य दिले जात असून, प्रशासन व लोकप्रतिनिधी यांच्या समन्वयातून ही कामे वेळेत पूर्ण करण्यावर भर दिला जात आहे.
