तोफखाना पोलिसांची मोठी कारवाई
अहिल्यानगर / नगर सह्याद्री
शहरातील जुना वडगाव गुप्ता रोडवरील जाधव मळा परिसरात तोफखाना पोलिसांनी सापळा रचून एका २५ वर्षीय तरुणाला बेकायदेशीर गावठी कट्टा आणि जिवंत काडतुसासह रंगेहात पकडले. याप्रकरणी पोलिसांनी आरोपीविरुद्ध भारतीय हत्यार कायद्यानुसार गुन्हा दाखल केला असून पुढील तपास सुरू आहे.
मिळालेल्या माहितीनुसार, तोफखाना पोलीस स्टेशनचे पोलीस निरीक्षक जगदीश भांबळ यांना गुप्त बातमीदारामार्फत एक इसम संशयास्पद रित्या शस्त्र घेऊन फिरत असल्याची माहिती मिळाली होती. या माहितीची खातरजमा करण्यासाठी त्यांनी तातडीने गुन्हे शोध पथकाला कारवाईचे आदेश दिले. पोलीस उपनिरीक्षक परशुराम दळवी आणि पोलीस कॉन्स्टेबल शाकीर ईस्माईल सय्यद यांच्या पथकाने दोन पंचासह जाधव नगरकडे जाणाऱ्या कच्च्या रस्त्यावर बाभळीच्या झाडाखाली सापळा लावला.
यावेळी पांढऱ्या व राखाडी रंगाचा चौकटीचा शर्ट घातलेला एक इसम संशयास्पद हालचाली करताना दिसून आला. पोलिसांनी त्यास घेराव घालून ताब्यात घेतले आणि त्याची झडती घेतली. झडतीमध्ये आरोपी कुणाल विलास जगताप (रा. निमगाव, ता. राहाता) याच्या कमरेला ३० हजार रुपये किमतीचा एक गावठी कट्टा आणि खिशात २०० रुपये किमतीचे एक जिवंत काडतुस मिळून आले. पोलिसांनी एकूण ३० हजार २०० रुपयांचा मुद्देमाल जप्त केला आहे.
पोलीस हवालदार विनोद गंगावणे यांनी गुन्हा दाखल केला असून पोलीस हवालदार दिनेश मोरे या प्रकरणाचा अधिक तपास करत आहेत. हा शस्त्रसाठा त्याने कोणाकडून आणि कोणत्या कारणासाठी आणला, याचा शोध आता पोलीस घेत आहेत.
