कान्हूरपठार येथील प्रकरण
पारनेर | नगर सह्याद्री
तालुक्यातील कान्हूर पठार येथे अल्पवयीन मुलींची छेडछाड करून अत्याचाराचा गंभीर गुन्हा करणार्या चार नराधमांना जेरबंद करण्यात पारनेर पोलिसांना यश आले आहे. या घटनेमुळे संपूर्ण तालुयात खळबळ उडाली असून, पीडित मुलींच्या पालकांमध्ये भीतीचे वातावरण होते. मात्र, पोलिसांनी अत्यंत शिताफीने तपास करून फरार असलेल्या चारही आरोपींना बेड्या ठोकल्या आहेत.
कान्हूर पठार येथील विशाल अनिल हुलावळे, प्रथमेश शंकर लोंढे, वैभव पोपट लोंढे आणि रोहित संजय चत्तर या चौघांनी अल्पवयीन मुलींशी अश्लील वर्तन करत त्यांची छेडछाड केली होती. याप्रकरणी पारनेर पोलीस ठाण्यात गुन्हा दाखल करण्यात आला होता. गुन्हा दाखल झाल्यापासून हे चौघेही आरोपी फरार झाले होते. पोलीस त्यांचा कसून शोध घेत होते. दि. २३ मार्च रोजी पोलीस निरीक्षक संतोष खेडकर यांना गोपनीय बातमीदारामार्फत माहिती मिळाली की, हे चारही आरोपी पारनेर पोलीस स्टेशनच्या हद्दीतच एका गुप्त ठिकाणी लपून बसले आहेत.
माहितीची खातरजमा होताच, पोलीस निरीक्षक खेडकर यांनी तातडीने तपास अधिकारी रणजीत मारग आणि डीबी पथकाला पाचारण केले. या पथकाने रात्रीच्या सुमारास सापळा रचून विशाल हुलावळे, प्रथमेश लोंढे, वैभव लोंढे आणि रोहित चत्तर या चौघांना ताब्यात घेतले. रात्री ११.२५ च्या सुमारास त्यांना अटक करण्यात आली. या पथकात पोलीय निरीक्षक संतोष खेडकर, रणजीत मारग, पी. आर. कांबळे, के. एन. लगड, ए. जी. धामणे, एस. बी. वाघ, डोंगरे, देविदास अकोलकर, जगदीश बुधवंत आणि एस. एस. शिंदे यांचा समावेश होता.
अटकेत असलेल्या या आरोपींना २४ मार्च रोजी अहिल्यानगर येथील विशेष न्यायाधीश, जिल्हा व सत्र न्यायालयात हजर करण्यात आले. न्यायालयाने गुन्ह्याचे गांभीर्य लक्षात घेऊन सर्व आरोपींना २७ मार्चपर्यंत पोलीस कोठडी सुनावली आहे. या आरोपींनी यापूर्वी अशा प्रकारचे इतर काही गुन्हे केले आहेत का, याचा तपास आता पोलीस करत असून लवकरच या प्रकरणाचा सविस्तर उलगडा होण्याची शयता आहे.
