निघोज | नगर सह्याद्री
निघोज परिसरातील तुकाई वस्ती परिसरातील सुरकुंडे वस्ती येथे बुधवारी (दि.22) रात्री आठ वाजता तीन बिबट्यांनी लोकांना एकत्र दर्शन दिल्याने निघोज व परिसरात घबराट पसरली आहे.
गेली अनेक दिवसांपासून निघोज परिसरात बिबट्यांचे वास्तव्य आहे. रामवाडी परिसरात बिबट्याने शेळीचा फडशा पाडत दुसऱ्या दिवशी वासरांवर हल्ला केला आहे. तसेच लंकेवस्ती, बोदगेवाडी, कवाद वस्ती या ठिकाणी बिबटे सातत्याने फिरत आहेत, मात्र मागणी करूनही बिबट्यांचा बंदोबस्त करण्यासाठी पिंजरे उपलब्ध होत नाहीत, अशी ग्रामस्थांची तक्रार आहे.
तुकाई वस्ती परिसर हा दाट लोकवस्तीचा परिसर आहे. जवळच कन्हैया दूध उद्योग समूह आहे. निघोज – शिरुर रस्त्यावर असलेल्या या तुकाई वस्ती परिसरात एकाचवेळी तीन बिबटे दिसल्याने जनतेमध्ये घबराट पसरली आहे. याचा वनसंरक्षक विभागाने त्वरित बंदोबस्त करावा व पिंजरे उपलब्ध करून द्यावेत, अशी मागणी जनतेतून होत आहे.
