सावेडीतील नंदनवन कॉलनीत घरफोडी; ८० हजारांचा ऐवज लंपास
अहिल्यानगर: शहरातील सावेडी भागातील पाईपलाईन रोडवरील नंदनवन कॉलनीत बंद घर फोडून अज्ञात चोरट्यांनी ८० हजार रुपयांचा मुद्देमाल लंपास केला. यामध्ये ३० हजार रुपयांची रोख रक्कम आणि ५० हजार रुपये किमतीचे सोन्या-चांदीचे दागिने असा ऐवज चोरीला गेला आहे. याप्रकरणी तोफखाना पोलीस ठाण्यात अज्ञात चोरट्यांविरुद्ध गुन्हा दाखल करण्यात आला आहे.
फिर्यादी साहिल श्रीराम पवार हे आपल्या कुटुंबासह पुणे येथे एका कार्यक्रमासाठी गेले होते. त्यांचे घर बंद असल्याचे पाहून चोरट्यांनी मुख्य दरवाजाचा कडी-कोंडा तोडून आत प्रवेश केला. घरातील कपाटाचे लॉकर तोडून चोरट्यांनी ५ ग्रॅम व ७ ग्रॅम वजनाच्या सोन्याच्या दोन अंगठ्या, २५० ग्रॅम वजनाचे चांदीचे बिस्कीट आणि ३० हजार रुपयांची रोकड असा एकूण ८० हजार रुपयांचा माल चोरून नेला. शेजाऱ्यांनी दरवाजा उघडा असल्याचे पाहिल्यानंतर ही घटना उघडकीस आली.
घटनेची माहिती मिळताच पोलिसांनी फिंगरप्रिंट तज्ञ आणि श्वान पथकाला पाचारण करून तपास केला. याप्रकरणी साहिल पवार यांच्या तक्रारीवरून तोफखाना पोलिसांनी गुन्हा नोंदवला असून पोलीस हवालदार गणेश साठे या प्रकरणाचा पुढील तपास करत आहेत. शहरात वाढत्या घरफोडीच्या सत्रामुळे नागरिकांमध्ये चिंतेचे वातावरण निर्माण झाले आहे.
वृद्ध सासूला मारहाण सुनेवर गुन्हा दाखल
अहिल्यानगर – शहरातील बालिकाश्रम रस्ता परिसरातील एका उच्चभ्रू वस्तीमध्ये ज्येष्ठ नागरिक असलेल्या सासूला अमानुष मारहाण केल्याची खळबळजनक घटना समोर आली आहे. आपल्या वृद्ध सासूचा सांभाळ करण्याऐवजी त्यांचा शारीरिक आणि मानसिक छळ करणाऱ्या सुनेविरुद्ध तोफखाना पोलीस ठाण्यात गुन्हा नोंदवण्यात आला आहे.
मिळालेल्या माहितीनुसार, संबंधित पीडित वृद्ध महिला आपल्या सून आणि नातीसोबत वास्तव्यास आहेत. मुलाच्या निधनानंतर या कुटुंबाची जबाबदारी सुनेवर असतानाही, घरगुती कारणावरून त्यांच्यात वारंवार खटके उडत होते. घटनेच्या दिवशी सून भ्रमणध्वनीवर मोठ्या आवाजात बोलत असताना, वृद्ध सासूने त्यांना हळू आवाजात बोलण्याची विनंती केली. या साध्या विनंतीचा राग अनावर झाल्याने सुनेने वृद्ध सासूला अर्वाच्य भाषेत शिवीगाळ करत लाथाबुक्क्यांनी गंभीर मारहाण केली.
या छळवणुकीनंतर पीडित महिलेने सुरुवातीला पोलीस दलाच्या भरोसा सेलकडे धाव घेतली होती. प्रशासनाने संबंधित सुनेला समुपदेशनासाठी वारंवार बोलावूनही तिने त्याकडे पाठ फिरवली. अखेर या प्रकरणात वृद्ध महिलेचा शारीरिक आणि मानसिक छळ होत असल्याचे स्पष्ट झाल्याने, पोलिसांनी सुनेविरुद्ध गुन्हा दाखल केला आहे. या प्रकरणाचा पुढील तपास पोलीस अंमलदार करत असून, ज्येष्ठ नागरिकांच्या सुरक्षिततेचा प्रश्न पुन्हा एकदा ऐरणीवर आला आहे. शहरातील सामाजिक स्तरातून या घटनेचा तीव्र निषेध व्यक्त होत आहे.
प्रॉपर्टी नावावर करण्यासाठी मुलाकडून निवृत्त सुभेदाराला लोखंडी रॉडने मारहाण; अहिल्यानगरमधील खळबळजनक घटना
अहिल्यानगर: राहत्या घराची संपूर्ण प्रॉपर्टी आपल्या नावावर करण्यासाठी एका मुलाने आपल्याच वडिलांना लोखंडी रॉडने बेदम मारहाण केल्याची संतापजनक घटना वैष्णवनगर, केडगाव येथे घडली आहे. या प्रकरणी कोतवाली पोलीस ठाण्यात गुन्हा दाखल करण्यात आला आहे.
मिळालेल्या माहितीनुसार, फिर्यादी सदाशिव शंकर भिंगारदिवे (वय ६१) हे भारतीय सैन्यातून निवृत्त सुबेदार असून ते केडगाव येथील तिरंगा चौकात वास्तव्यास आहेत. २६ एप्रिल रोजी रात्री ८ वाजेच्या सुमारास त्यांचा मुलगा आरोपी शिवम शंकर भिंगारदिवे याने घरातील मालमत्ता स्वतःच्या नावावर करण्यासाठी तगादा लावला. मात्र, सदाशिव यांनी मालमत्ता आताच नावावर करण्यास नकार दिला. याचा राग मनात धरून शिवमने आपल्या वडिलांना शिवीगाळ करण्यास सुरुवात केली.
रागाच्या भरात शिवमने घरातील लोखंडी रॉड घेऊन वडिलांवर हल्ला केला आणि त्यांना शारीरिक इजा पोहचवली. तसेच मालमत्ता नावावर न केल्यास जीवे मारण्याची धमकीही दिली. या घटनेनंतर सदाशिव भिंगारदिवे यांनी कोतवाली पोलीस ठाण्यात धाव घेऊन तक्रार दिली. पोलिसांनी भारतीय न्याय संहितेच्या विविध कलमान्वये आरोपी शिवम विरुद्ध गुन्हा नोंदवला आहे. या घटनेचा पुढील तपास पोलीस निरीक्षक संभाजी गायकवाड यांच्या मार्गदर्शनाखाली पोलीस अंमलदार गाजरे करत आहेत. मुलानेच वडिलांवर जीवघेणा हल्ला केल्याने परिसरात खळबळ उडाली आहे.
इन्स्टाग्रामवर एआय फोटोंच्या माध्यमातून बदनामी; सायबर पोलिसांत गुन्हा दाखल
अहिल्यानगर: सोशल मीडियाचा गैरवापर करून एका दुकानदाराची आणि एका महिलेची बदनामी केल्याचा धक्कादायक प्रकार अहिल्यानगरमध्ये उघडकीस आला आहे. एका तरुणाने कृत्रिम बुद्धिमत्तेचा (AI) वापर करून आक्षेपार्ह फोटो तयार केले आणि ते इन्स्टाग्राम स्टोरीवर प्रसारित करून समाजात बदनामी केली. याप्रकरणी सायबर पोलीस ठाण्यात संबंधित खातेधारकावर गुन्हा नोंदवण्यात आला आहे.
नेवासा तालुक्यातील एका मोबाईल दुकानदाराने या संदर्भात फिर्याद दिली आहे. फिर्यादीने दिलेल्या माहितीनुसार, एका संशयित इन्स्टाग्राम खातेधारकाने फिर्यादीच्या पत्नीबद्दल अत्यंत अश्लील मजकूर आपल्या स्टोरीमध्ये लिहिला होता. इतकेच नव्हे तर, फिर्यादी आणि गावातील एका महिलेचे छायाचित्र घेऊन कृत्रिम बुद्धिमत्तेच्या मदतीने (AI) आक्षेपार्ह फोटो तयार करण्यात आले. हे बनावट फोटो सोशल मीडियावर सार्वजनिक करून दोघांचीही मोठी बदनामी करण्याचा प्रयत्न करण्यात आला.
हा प्रकार मार्च महिन्यापासून सुरू होता. वारंवार होणाऱ्या या त्रासाला कंटाळून अखेर पीडित व्यक्तीने सायबर पोलिसांकडे धाव घेतली. पोलिसांनी या प्रकरणाची गांभीर्याने दखल घेत भारतीय न्याय संहिता आणि माहिती तंत्रज्ञान कायद्यातील विविध कलमान्वये गुन्हा दाखल केला आहे. या प्रकरणाचा पुढील तपास पोलीस निरीक्षक सागर ढिकले यांच्या मार्गदर्शनाखाली सुरू असून, आरोपीचा तांत्रिक शोध घेतला जात आहे. सोशल मीडियाचा वापर करताना नागरिकांनी खबरदारी घेण्याचे आवाहन प्रशासनाकडून करण्यात आले आहे.
जेऊर येथील इलेक्ट्रिकल दुकानात धाडसी चोरी; ६० हजारांची कॉपर वायर लंपास
अहिल्यानगर – शहरालगत असलेल्या जेऊर परिसरात चोरट्यांनी आपला मोर्चा वळवला असून, एका इलेक्ट्रिकल दुकानाचे पत्रे उचकटून सुमारे ६० हजार रुपये किमतीचा मुद्देमाल लंपास केल्याची घटना उघडकीस आली आहे. या प्रकरणी एमआयडीसी पोलीस ठाण्यात अज्ञात चोरट्याविरुद्ध गुन्हा दाखल करण्यात आला आहे.
मिळालेल्या माहितीनुसार, जेऊर येथील ‘गुरु माऊली इलेक्ट्रिकल’ या दुकानात ही चोरी झाली. फिर्यादी कैलास बाबासाहेब ससे (वय २६, रा. रासेवाडी) यांनी आपले दुकान २६ एप्रिल रोजी सायंकाळी नेहमीप्रमाणे बंद केले होते. दरम्यान, रात्रीच्या अंधाराचा फायदा घेत अज्ञात चोरट्याने दुकानाच्या पाठीमागिल बाजूचे पत्रे उचकटून आत प्रवेश केला. चोरट्याने दुकानातील १२०० रुपये किलो दराची एकूण ५० किलो वजनाची कॉपरची इलेक्ट्रिक वाइंडिंग वायर चोरून नेली.
दुसऱ्या दिवशी सकाळी साडेआठच्या सुमारास दुकान उघडल्यानंतर हा प्रकार लक्षात आला. स्वतःच्या आर्थिक फायद्यासाठी चोरट्याने हा डल्ला मारला असून, परिसरात भीतीचे वातावरण आहे. या घटनेची माहिती मिळताच एमआयडीसी पोलीस ठाण्याचे सहाय्यक पोलीस निरीक्षक चौधरी आणि पोलीस हवालदार अडबल यांनी घटनास्थळाची पाहणी केली. पोलिसांनी अज्ञात चोरट्याविरुद्ध भारतीय न्याय संहिता कलम ३०३ (२) नुसार गुन्हा नोंदवला असून, पुढील तपास पोलीस हवालदार खेडकर करत आहेत. गुन्हेगारांचा शोध घेण्यासाठी परिसरातील संशयास्पद हालचालींची चौकशी सुरू आहे.
धक्का लागल्याच्या कारणावरून तरुणावर चॉपरने हल्ला; पाच जणांविरुद्ध गुन्हा दाखल
अहिल्यानगर: नगर तालुक्यातील जेजुरी राणमळा परिसरात धक्का लागल्याच्या किरकोळ कारणावरून एका तरुणावर प्राणघातक हल्ला झाल्याची घटना घडली आहे. याप्रकरणी नगर तालुका पोलीस ठाण्यात पाच जणांविरुद्ध विविध कलमान्वये गुन्हा दाखल करण्यात आला आहे.
मिळालेल्या माहितीनुसार, फिर्यादी संकेत अर्जुन मोरे हे नेभी येथील बिरोबा मंदिरामध्ये गेले होते. तेथे गर्दी असल्यामुळे त्यांचा धक्का एका व्यक्तीला लागला. याच कारणाचा राग धरून सचिन बाळासाहेब जयकर, सौरभ छबू जयकर, अभिजीत साहेबराव मोरे, सार्थक रभाजी जयकर आणि शुभम रभाजी जयकर यांनी बेकायदा मंडळी जमवून फिर्यादीला गाठले. “तू आमच्या माणसाला धक्का का दिला?” अशी विचारणा करत त्यांनी वाद घालण्यास सुरुवात केली.
संकेत यांनी हा धक्का चुकून लागल्याचे सांगूनही आरोपींनी त्यांचे काहीही ऐकले नाही. आरोपींनी फिर्यादीला शिवीगाळ करत लाथाबुक्क्यांनी मारहाण करण्यास सुरुवात केली. यावेळी सौरभ जयकर याने संकेत यांना जमिनीवर पाडले, तर सचिन जयकर याने आपल्याकडील चॉपरने संकेत यांच्या तोंडावर वार करून त्यांना गंभीर जखमी केले. इतर आरोपींनी यावेळी त्यांना जीवे मारण्याची धमकी दिली.
या घटनेनंतर जखमी तरुणावर शासकीय रुग्णालयात उपचार करण्यात आले. प्रकृतीत सुधारणा झाल्यानंतर संकेत मोरे यांनी पोलीस ठाण्यात धाव घेऊन तक्रार दिली. या तक्रारीवरून पोलिसांनी भारतीय न्याय संहितेच्या विविध कलमान्वये पाचही आरोपींविरुद्ध गुन्हा नोंदवला आहे. या प्रकरणाचा पुढील तपास पोलीस हवालदार खंडेराव शिंदे करत आहेत.
