दुसऱ्याबरोबर लग्न केले तर मारून टाकण्याची धमकी
राहुरी | नगर सह्याद्री
तू माझ्याशी लग्न करायचे, मला सोडून दुसऱ्या बरोबर लग्न केले तर तुला व तुझ्या घरच्यांना जीवे मारून टाकीन, अशी धमकी देऊन आरोपीने एका अल्पवयीन कॉलेज तरुणीचा विनयभंग केल्याची घटना राहुरी तालुक्यातील विद्यापीठ येथे घडली.
अल्पवयीन मुलगी राहुरी तालुक्यातील वांबोरी परिसरातील एका गावात कुटुंबासह राहत आहे. तरुणीचे 12 वी बोर्डाचे पेपर कृषी विद्यापीठ राहुरी येथे असल्याने दि. 11 मार्च रोजी दुपारी 1 वाजेच्या सुमारास तरुणी विद्यापीठ येथे पेपर देण्याकरिता आली. आरोपी तेथे आला. त्याने तरुणीला गाडीत बसवले. दोघांचे फोटो त्याचे मोबाईलमध्ये काढले. नंतर तिचा हातपकडून जवळ ओढले आणि लज्जा उत्पन्न होईल, असे गैरवर्तन केले. त्यानंतर जूनमध्ये आरोपीने तरुणीला फोन करुन शिवीगाळ केली. तू माझ्याशी लग्न करायचे, मला सोडून दुसऱ्याबरोबर लग्न केले तर तुला व तुझ्या घरच्यांना जीवे मारून टाकीन, अशी धमकी दिली. दि. 7 जुलै रोजी सायंकाळच्या सुमारास आरोपीने तरुणीच्या एका नातेवाईकाच्या मोबाईलवर फोन करून म्हणाला की, तुम्ही तरुणीचे लग्न ज्या मुलाबरोबर करणार आहेत, त्याला आमचे दोघांचे फोटो दाखवून लग्नात आमच्या समाजाचे सर्व लोक घेऊन येतो, मग बघा काय होते, अशी धमकी दिली.
आरोपीच्या त्रासाला कंटाळून तरुणीने राहुरी पोलीस ठाण्यात फिर्याद दाखल केली. फिर्यादीवरून आरोपी ओंकार प्रभाकर उर्फ महम्मद वैरागर (रा. ब्राम्हणी) याच्यावर गुन्हा दाखल करण्यात आला.
