खरवंडी कासार | नगर सह्याद्री
महाराष्ट्रात वारीची लगबग सुरू झाली असतानाच भगवानगडांचे महंत डॉ.नामदेव महाराज शास्त्री यांच्या अधिपत्याखाली लंडन ते पंढरपूर ग्लोबल वारी निघाली आहे. सुमारे 11 देशांचा हजारो किलोमीटर प्रवास करून परदेशी वारकरी पंढरपूरमध्ये दाखल होणार आहेत.
6 जून रोजी लंडनच्या रॉयल विंडसर रेस कोर्सवरून या ग्लोबल वारीला भगवान गडाचे महंत डॉ.नामदेव महाराज शास्त्री यांच्या उपस्थितीत प्रारंभ झाला. तब्बल 50 दिवसाचा प्रवास करून 25 जुलै रोजी (आषाढी एकादशी) पंढरपूरमध्ये दाखल होणार आहे. या वारीचा सुमारे 11 देशांमधून प्रवास होणार आहे.
ही दिंडी केवळ लंडनपूत मर्यादित नसून नेदरलँड, फ्रान्स, जर्मनी पोलंड, हंगेरी, बेल्जियम, रोमानिया, झेक रिपब्लिक व तुर्की अशा विविध देशांमधून या दिंडीचा प्रवास आहे. कपाळी गंध, हातात भगवी पताका, मुखी विठू नामाचा गजर करीत शेकडो परदेशी वारकरी या दिंडीमध्ये सहभागी झाले आहेत. या ग्लोबल वारीमुळे सातासमुद्रापारचे अनेक देश वारकरी संप्रदायाशी जोडले जाणार आहेत.
