श्रीगोंदा | नगर सह्याद्री
तालुक्यातील घोडेगाव येथे शेतात काम करत असताना अंगावर वीज पडून 22 वषय तरुणाचा दुर्दैवी मृत्यू झाल्याची घटना घडली. या घटनेमुळे घोडगाव परिसरात हळहळ व्यक्त होत असून संपूर्ण गावावर शोककळा पसरली आहे.
घोडेगावचे माजी सरपंच रूपचंद देरेकर यांचे चिरंजीव अभिषेक रूपचंद देरेकर (वय 22) हे सोमवारी दुपारच्या सुमारास आपल्या शेतात ट्रॅक्टर चालवत काम करत होते. दुपारी साडेतीनच्या सुमारास त्यांचे वडील रूपचंद देरेकर शेतात आले असता अभिषेक ट्रॅक्टरवरून खाली उतरले होते.
याचवेळी अचानक कडकडाटासह वीज कोसळली आणि ती थेट अभिषेक यांच्या अंगावर पडली. या भीषण घटनेत त्यांचा जागीच मृत्यू झाला. घटनेची माहिती मिळताच नातेवाईक, ग्रामस्थ आणि परिसरातील नागरिकांनी घटनास्थळी धाव घेतली. मात्र, तोपर्यंत अभिषेक यांचा मृत्यू झाल्याचे स्पष्ट झाले होते. घटनेनंतर मृतदेह पुढील वैद्यकीय व कायदेशीर प्रक्रियेसाठी श्रीगोंदा ग्रामीण रुग्णालयात हलविण्यात आला.
