छत्रपती संभाजीनगर –
छत्रपती संभाजीनगर शहरातील छावणी परिसरातील लिटिल फ्लॉवर शाळेत एक धक्कादायक घटना घडली आहे. टीसी म्हणजेच शाळा सोडल्याचा दाखला घेण्यासाठी आलेल्या १७ वर्षीय अल्पवयीन मुलाने शिक्षकावर चाकूने हल्ला केला. या हल्ल्यात शिक्षक गंभीर जखमी झाले असून त्यांच्यावर सध्या घाटी रुग्णालयात उपचार सुरू आहेत. या घटनेमुळे शाळेतील शिक्षक, विद्यार्थी आणि पालकांमध्ये भीतीचे वातावरण निर्माण झालंय.
मिळालेल्या माहितीनुसार, संबंधित मुलगा २०२३ पर्यंत या शाळेत शिकत होता. मात्र तो दहावीच्या परीक्षेत नापास झाला होता. त्यानंतर त्याने शाळा सोडली होती. आज तो टीसी घेण्यासाठी शाळेत आला होता. यावेळी टीसीसंदर्भात त्याचा शिक्षकांसोबत काही कारणावरून वाद झाला. हा वाद काही क्षणांतच वाढला आणि रागाच्या भरात त्याने सोबत आणलेल्या चाकूने शिक्षकांवर हल्ला केला.
हा संपूर्ण प्रकार शाळेतील सीसीटीव्ही कॅमेऱ्यात कैद झाला आहे. हल्ल्यानंतर शाळेतील इतर शिक्षकांनी आणि कर्मचाऱ्यांनी तातडीने धाव घेत संबंधित मुलाला पकडलं. त्यानंतर त्याला पोलिसांच्या स्वाधीन करण्यात आलं. अल्पवयीन असल्यामुळे पोलिसांनी त्याला चौकशीसाठी ताब्यात घेतलं असून पुढील कायदेशीर प्रक्रिया सुरू आहे.
या प्रकरणाबाबत माहिती देताना छावणी पोलीस ठाण्याचे पोलीस निरीक्षक विवेक जाधव यांनी सांगितलं की, संबंधित विद्यार्थ्याचा शिक्षकांसोबत टीसीवरून वाद झाला होता. प्राथमिक चौकशीत मुलाने २०२३ मध्ये शिक्षकांनी मला जाणूनबुजून नापास केलं असा राग मनात असल्याचं सांगितलं आहे. त्याच रागातून त्याने आता शाळेत येऊन शिक्षकांवर हल्ला केल्याचं समोर आलंय.
सध्या जखमी शिक्षकांची प्रकृती गंभीर असून त्यांच्यावर घाटी रुग्णालयात उपचार सुरू आहेत. पोलिसांनी अल्पवयीन मुलाला ताब्यात घेतलं असून या प्रकरणात गुन्हा दाखल करण्याची प्रक्रिया सुरू आहे. या घटनेमुळे शाळेच्या सुरक्षिततेचा प्रश्न पुन्हा एकदा ऐरणीवर आला असून अशा घटना रोखण्यासाठी अधिक कडक उपाययोजनांची गरज असल्याची चर्चा सुरू झालीये.
