मुंबई : बॉलिवूडचा ‘भाई’ म्हणून ओळखला जाणारा सलमान खान पुन्हा एकदा आपल्या चाहत्यांसाठी ईदचा मोठा सरप्राइज घेऊन येत आहे. त्याने आपल्या नव्या चित्रपटाची अधिकृत घोषणा केली असून हा बहुप्रतिक्षित चित्रपट ईद २०२७ मध्ये प्रदर्शित होणार आहे. सोशल मीडियावर शेअर केलेल्या व्हिडिओमधून सलमानने शूटिंगची खास झलक दाखवली, ज्यामुळे चाहत्यांची उत्सुकता शिगेला पोहोचली आहे.
या चित्रपटात सलमान खानसोबत दक्षिणेतील सुपरस्टार नयनतारा मुख्य भूमिकेत दिसणार आहे. विशेष म्हणजे, ही जोडी पहिल्यांदाच मुख्य भूमिकेत एकत्र येत आहे. याआधी दोघे ‘गॉडफादर’मध्ये दिसले होते, पण त्यात त्यांची जोडी नव्हती.
सध्या ‘एसव्हीसी ६३’ या तात्पुरत्या नावाने ओळखल्या जाणाऱ्या या चित्रपटाचे दिग्दर्शन वामशी करत आहेत, तर निर्मिती दिल राजू यांच्या बॅनरखाली होत आहे. हा मोठ्या बजेटचा अॅक्शन थ्रिलर असून, चित्रपटाचे शूटिंगही सुरू झाले आहे. सेटवरील व्हिडिओमध्ये भव्य लोकेशन्स आणि दमदार अॅक्शनची झलक पाहायला मिळते.
चित्रपटात थरारक अॅक्शन सीन्स असणार असल्याची चर्चा असून, ईदच्या निमित्ताने हा एक परफेक्ट मसाला एंटरटेनर ठरेल, असा अंदाज व्यक्त केला जात आहे. सलमानच्या प्रत्येक ईद रिलीजला मिळणारा जबरदस्त प्रतिसाद लक्षात घेता, या चित्रपटाकडूनही मोठ्या अपेक्षा आहेत.
दरम्यान, सलमान खानचा ‘मातृभूमी’ हा चित्रपटही सध्या चर्चेत आहे. या चित्रपटात त्याच्यासोबत चित्रांगदा सिंह दिसणार असून, भारत-चीन संबंधांवर आधारित कथा असल्याचे सांगितले जाते. सुरुवातीला एप्रिल २०२६ मध्ये रिलीज होणारा हा चित्रपट आता जुलैमध्ये येण्याची शक्यता आहे.
एकूणच, सलमान खानने ईद २०२७ साठी चाहत्यांना मोठी ट्रीट दिली असून, आता या चित्रपटाचे अधिकृत नाव, कथा आणि इतर कलाकारांविषयी अधिक माहिती मिळण्याची प्रेक्षकांना उत्सुकता आहे.
