“तुम तो ठहरे परदेसी’ या लोकप्रिय गीताचे गीतकार कालवश

गीतकार जहीर आलम काळाच्या पडद्याआड;
“तुम तो ठहरे परदेसी’ या लोकप्रिय गीताचे गीतकार
नागपूर / नगर सह्याद्री
90 च्या दशकातील सर्वाधिक हिट गाण्यांपैकी ‘तुम तो ठहरे परदेसी,साथ क्या निभाओगे’या गाण्याचे सुप्रसिद्ध गीतकार जहीर आलम यांचे आज निधन झाले. नागपुरात ते वास्तव्यास होते. अल्ताफ राजा यांच्या आवाजातील हे गाणं 90 च्या दशकात तरुणांनी अक्षरशः डोक्यावर घेतलेलं. या गीताचे गीतकार जहीर आलम यांच्या निधनाने हिंदी संगीत विश्वातील काळाच्या ओघात दुर्लक्ष झालेला हिरा कायमचा हरपल्याची भावना व्यक्त होत आहे.रविवारी रात्री एका खासगी रुग्णालयात उपचारादरम्यान त्यांनी अखेरचा श्वास घेतला.
एकेकाळी देशभरात सुपरहिट झालेलं हे गाणं सुरुवातीला स्थानिक पातळीवर गायले जात होते. मात्र गायक अल्ताफ राजा यांच्या खास शैलीत हे गाणं सादर झाल्यानंतर रातोरात या गाण्याला प्रचंड लोकप्रियता मिळाली. ती इतकी की हॉटेल्स, पानपट्ट्या, बस स्थानके, गल्लीबोळात हे गाणं ऐकू येऊ लागलं. एवढेच नाही तर 90 च्या दशकात अनेक कॉलेज, शाळांमधील गॅदरिंगमध्ये सुद्धा तरुण या गाण्यावर थिरकू लागली.
या गाण्यानं अल्ताफ राजा एका रात्रीत सुपरस्टार झाले. या म्युझिक कंपनीचा ही प्रचंड फायदा झाला. मात्र या गाण्याचे बोल लिहिणारे गीतकार जहीर आलम यांच्या वाटायला फारशी प्रसिद्धी, पैसा आला नाही. गीतकार जहीर आलम यांचं सगळं आयुष्य आर्थिक विवंचनेत आणि संघर्षातच गेलं. एम्प्रेस मिलमध्ये ते नोकरीला होते. मात्र, ही मिल नंतर बंद पडली आणि त्यांच्या आयुष्यात आणखी एक कष्टाची पायरी वाढली. जहीर आलम यांच्या निधनाने नागपूरच्या संगीत व सांस्कृतिक वर्तुळातून हळहळ व्यक्त केली जात आहे

Share on WhatsApp