हिंगणी परिसरात कारवाई
तीन हायवा जप्त; 60 लाख 30 हजार रुपयांचा मुद्देमाल हस्तगत
श्रीगोंदा | नगर सह्याद्री
तालुक्यातील हिंगणी परिसरात सुरू असलेल्या अवैध माती उत्खनन व वाहतुकीवर महसूल विभागाने मोठी कारवाई करत तीन हायवा वाहनांसह तब्बल 60 लाख 30 हजार रुपयांचा मुद्देमाल जप्त केला आहे. याप्रकरणी बेलवंडी पोलीस ठाण्यात फिर्याद दाखल करण्यात आली आहे.
ग्राममहसूल अधिकारी आकाश दोरसले यांनी फिर्याद दिली. तहसीलदार सचिन डोंगरे यांना हिंगणी व निंबवी परिसरात अवैध माती उत्खनन सुरू असल्याची गोपनीय माहिती मिळाली होती. त्यानुसार महसूल विभागाचे पथक दि.27 मे रोजी दुपारी कारवाईसाठी रवाना झाले. हिंगणी-गव्हाणवाडी रस्त्यावर महसूल पथकाने संशयित हायवा वाहनांना थांबविण्याचा प्रयत्न केला असता काही चालकांनी वाहनांसह पळ काढण्याचा प्रयत्न केला. मात्र, महसूल विभागाने पंचनामा करून वाहनांमधील पोयटा माती जप्त केली.या कारवाईत हायवा वाहनांसह अन्य एक वाहन ताब्यात घेण्यात आले. प्रत्येकी सुमारे 20 लाख रुपये किमतीची वाहने तसेच त्यामधील पोयटा माती, असा एकूण 60 लाख 30 हजार रुपयांचा मुद्देमाल जप्त करण्यात आला आहे.
संबंधित वाहन चालकांकडे माती उत्खनन अथवा वाहतुकीसाठी कोणताही वैध परवाना आढळून आला नसल्याचे फिर्यादीत म्हटले आहे. शासनाचा महसूल बुडवणे, विनापरवाना गौणखनिज उत्खनन करणे व पर्यावरणाची हानी करणे आदी आरोपांखाली संबंधितांविरोधात बेलवंडी पोलीस ठाण्यात गुन्हा दाखल करण्याची प्रक्रिया सुरू आहे.
