मुंबई / नगर सह्याद्री –
फिल्म इंडस्ट्रीची चमकदार आणि ग्लॅमरस बाजू सर्वांना दिसते, मात्र पडद्यामागे अनेक कटू अनुभव दडलेले असतात. याबाबत आता पुन्हा एकदा अभिनेत्री Tanushree Dutta हिने मोठा खुलासा केला आहे. तिच्या वक्तव्यामुळे सध्या बॉलिवूडमध्ये चर्चा रंगली आहे.
तनुश्री दत्ता म्हणाली की, इंडस्ट्रीमध्ये अनेकदा कलाकारांच्या महत्त्वाकांक्षा आणि स्वप्नांचा गैरफायदा घेतला जातो. लहानपणी आई-वडील अनोळखी लोकांपासून सावध राहायला सांगायचे, मात्र फिल्म इंडस्ट्रीमध्ये लोक वेगवेगळ्या प्रकारे लोकांना आकर्षित करतात आणि त्यांच्या इच्छांशी खेळतात, असे तिने सांगितले.
तिच्या मते, इंडस्ट्रीमध्ये काही मुलींना गंभीर शोषणाला सामोरे जावे लागते. काही जणी परिस्थितीमुळे चुकीच्या मार्गावर जातात, तर काहींना जबरदस्तीने वेश्या व्यवसायात ढकलले जाते, असा आरोपही तिने केला. अनेक जणी मानसिकदृष्ट्या इतक्या दुखावल्या जातात की त्या सर्वकाही सोडून घरी परततात, असेही ती म्हणाली.
तनुश्रीने असेही सांगितले की, या गोष्टी फार क्वचितच सार्वजनिक होतात. कारण फिल्म इंडस्ट्रीमध्ये केवळ यशोगाथाच बाहेर येतात आणि अपयश किंवा शोषणाच्या कथा दडपल्या जातात.
दरम्यान, 2018 मध्ये झालेल्या MeToo movement मोहिमेदरम्यान तनुश्री दत्ताने ज्येष्ठ अभिनेते Nana Patekar यांच्यावर गंभीर आरोप केले होते. मात्र नाना पाटेकर यांनी हे सर्व आरोप फेटाळले होते.
काही वर्षांपूर्वी बॉलिवूडमध्ये सक्रिय असलेली तनुश्री दत्ता सध्या इंडस्ट्रीपासून दूर आहे. ती आता शांत आणि एकांत जीवन जगत असून अध्यात्मिक मार्ग स्वीकारल्याची माहिती समोर आली आहे.
