मुंबई : हिंदी चित्रपटसृष्टीत 80 आणि 90 च्या दशकात खलनायकांचीही तितकीच दहशत होती, जितकी नायकांची लोकप्रियता. त्या काळात पडद्यावर एक परदेशी चेहरा वारंवार दिसायचा आणि आपल्या दमदार व्यक्तिमत्त्वाने प्रेक्षकांवर छाप पाडायचा. हा अभिनेता म्हणजे Bob Christo.
20 मार्च 1938 रोजी सिडनी येथे जन्मलेल्या बॉब क्रिस्टो यांचे खरे नाव रॉबर्ट जॉन क्रिस्टो होते. ते सिव्हिल इंजिनिअरिंगमध्ये उच्चशिक्षित होते. ग्रीक आणि जर्मन वंशाच्या कुटुंबात वाढलेल्या बॉब यांनी जर्मनीत शिक्षण घेत असताना नाट्यकलेतही रस घेतला. त्याच काळात त्यांची हेल्गा यांच्याशी ओळख झाली आणि पुढे त्यांनी विवाह केला. मात्र, एका अपघातात पत्नीचा मृत्यू झाल्याने त्यांच्या आयुष्याला मोठा धक्का बसला.
त्यांच्या आयुष्यातील टर्निंग पॉइंट ठरला तो एका मासिकाच्या मुखपृष्ठावरील Parveen Babi यांचा फोटो. त्या फोटोने प्रभावित होऊन त्यांनी सर्व काही सोडून भारतात येण्याचा निर्णय घेतला. मुंबईत आल्यानंतर त्यांनी परवीन बाबींची भेट घेतली आणि याच भेटीतून त्यांच्या बॉलिवूड प्रवासाची सुरुवात झाली.
परवीन बाबी यांच्या मदतीने त्यांना चित्रपटात कामाची संधी मिळाली. Sanjay Khan यांनी 1980 साली प्रदर्शित झालेल्या Abdullah या चित्रपटातून त्यांना पहिली मोठी भूमिका दिली. त्यानंतर बॉब क्रिस्टो यांनी मागे वळून पाहिले नाही.
80-90 च्या दशकात ते बॉलिवूडमधील सर्वाधिक लोकप्रिय विदेशी खलनायकांपैकी एक बनले. विशेषतः Amitabh Bachchan यांच्यासोबतचे त्यांचे अॅक्शन सीन प्रेक्षकांनी विशेष पसंत केले. उंच बांधा, प्रभावी स्क्रीन प्रेझेन्स आणि दमदार अभिनय यामुळे त्यांनी वेगळी ओळख निर्माण केली.
बॉब क्रिस्टो यांनी आपल्या कारकिर्दीत सुमारे 200 हून अधिक चित्रपटांमध्ये काम केले. हिंदीसोबतच दक्षिण भारतीय चित्रपटसृष्टीतही त्यांनी आपली छाप सोडली. चित्रपटांपासून दूर गेल्यानंतर ते बेंगळुरूमध्ये स्थायिक झाले आणि योग प्रशिक्षक म्हणून साधं, शांत आयुष्य जगू लागले.
