मुंबई / नगर सह्याद्री –
बॉलिवूड अभिनेत्री प्रीती झिंटा सध्या पुन्हा एकदा सोशल मीडियावर चर्चेच्या केंद्रस्थानी आहे. कारण केवळ तिच्या चित्रपट कारकिर्दीमुळे नाही, तर इंडियन प्रीमियर लीग मधील तिच्या संघ पंजाब किंग्स च्या दमदार कामगिरीमुळे आणि सोशल मीडियावर दिलेल्या स्पष्ट व ठाम उत्तरामुळेही ती चर्चेत आली आहे.
अलीकडेच प्रिती झिंटाने एक्स (पूर्वीचे ट्विटर) वर चाहत्यांशी संवाद साधला. याच दरम्यान एका युजरने तिला “तूच ट्रॉफी आहेस..” अशी टिप्पणी केली. हा शब्दप्रयोग अनेकांना सामान्य वाटला असला तरी प्रितीने त्यावर अत्यंत स्पष्ट आणि ठाम भूमिका घेतली.
तिने उत्तरात म्हटलं की, “कोणत्याही महिलेला ट्रॉफी बनायची इच्छा नसते. ट्रॉफी जिंकल्या जातात आणि त्या शोकेसमध्ये ठेवतात. पण महिला ही कोणाचीही संपत्ती नाही. तिची जागा कोणत्याही शोकेसमध्ये नाही, तर आयुष्यात आणि हृदयात असते.” असं ती म्हणाली आहे.
तिच्या या विधानामुळे सोशल मीडियावर मोठी चर्चा निर्माण झाली. अनेकांनी तिच्या मताला पाठिंबा देत महिलांच्या सन्मानाबाबत तिची भूमिका योग्य असल्याचं म्हटलं. काहींनी मात्र हे उत्तर खूपच गंभीर असल्याची चर्चा केली, पण एकूणच तिच्या स्पष्टवक्तेपणाचं कौतुकच जास्त झालं.
प्रिती झिंटा ही पंजाब किंग्स ची सह-मालकीण असून यंदाच्या हंगामात टीमची कामगिरी अतिशय प्रभावी ठरत आहे. कर्णधार श्रेयस अय्यर यांच्या नेतृत्वाखाली संघाने आक्रमक आणि संतुलित खेळ दाखवत चाहत्यांचं लक्ष वेधून घेतलं आहे.
बॉलिवूडमध्ये प्रीती झिंटाचा प्रवासही अत्यंत लक्षवेधी राहिला आहे. 1990 च्या शेवटच्या दशकात आणि 2000 च्या सुरुवातीला ती आघाडीच्या अभिनेत्रींपैकी एक मानली जात होती. ‘दिल से..’ सिनेमाच्या माध्यमातून तिने बॉलिवूडमध्ये प्रभावी पदार्पण केले.
तिच्या अभिनयाची खासियत म्हणजे नैसर्गिक अभिव्यक्ती आणि आत्मविश्वासपूर्ण स्क्रीन प्रेझेन्स आहे. अभिनेत्रीने वेगळ्या शैलीतील आपल्या भूमिका सिने रसिकांसमोर मांडल्या आहेत.
प्रिती झिंटा ही केवळ एक अभिनेत्री नसून, एक स्पष्ट विचारसरणी असलेली व्यक्ती आहे. सोशल मीडियावर दिलेल्या तिच्या ठाम उत्तराने तिने महिलांच्या सन्मानाबाबत एक महत्त्वाचा संदेश दिला आहे. चित्रपट, क्रीडा आणि सामाजिक भूमिका या तिन्ही क्षेत्रांत तिची उपस्थिती तिला कायमच चर्चेत ठेवते. प्रीती झिंटाचा हा प्रवास दाखवतो की लोकप्रियता केवळ ग्लॅमरपुरती मर्यादित नसते, तर ती विचार, भूमिका आणि कृतीतूनही टिकून राहते.
