मुंबई – अभिनेत्री काजोल गेली तीन दशकं हिंदी चित्रपटसृष्टीत सक्रिय असून तिने दिलवाले दुल्हनियाँ ले जाएंगे, कभी खुशी कभी गम आणि कुछ कुछ होता है सारख्या गाजलेल्या चित्रपटांत काम केलं आहे. 2023 मध्ये तिने ओटीटीवर द ट्रायल – प्यार, कानून, धोखा या वेब सिरीजद्वारे पदार्पण केलं. या सिरीजमध्ये काम करताना तिने अनेक वर्षं पाळलेली ‘नो किसिंग’ पॉलिसी मोडल्याने मोठी चर्चा रंगली होती.
अलीकडे लिली सिंह हिच्या पॉडकास्टमध्ये बोलताना काजोलने यामागचं कारण स्पष्ट केलं. ती म्हणाली की, त्या सीनचा कथानकात महत्त्वाचा भाग होता. तो केवळ रोमँटिक सीन नसून पात्राच्या विचारसरणी, भावना आणि तिच्या आयुष्यातील बदल दाखवणारा होता. त्यामुळे तो सीन काढून टाकणं शक्य नव्हतं.
काजोलने हेही मान्य केलं की हा सीन करताना ती सुरुवातीला खूप अस्वस्थ होती. शूटिंगपर्यंत पोहोचेपर्यंत तिला स्वतःलाही खात्री नव्हती की ती तो सीन करेल की नाही. मात्र शेवटी तिने व्यावसायिक दृष्टीकोनातून निर्णय घेतला आणि तो सीन पूर्ण केला.
या सिरीजमध्ये काजोलने नोयोनिका सेनगुप्ता ही भूमिका साकारली आहे—एक गृहिणी जी पतीच्या वादानंतर पुन्हा वकिली क्षेत्रात परतते. या कोर्टरूम ड्रामाचं दिग्दर्शन सुपर्ण वर्मा यांनी केलं आहे.
