अहिल्यानगर / नगर सह्याद्री :
फॅशन क्षेत्रात अभिमानास्पद कामगिरी करत नगरच्या फॅशन डिझायनर विनल मनोज गुंदेचा यांच्या डिझाईन्सची निवड प्रतिष्ठित ‘लॅक्मे फॅशन वीक जेननेक्स्ट मार्च २०२६’ साठी झाली आहे. त्यांना या फॅशन वीकमध्ये विजेतेपदही मिळाले आहे. दि. २० मार्च रोजी मुंबई येथे आयोजित लॅक्मे फॅशन वीकच्या रॅम्पवर गुंंदेचा आपला पहिले कलेक्शन “ अ पोस्टकार्ड फ्रॉम व्हॅली ऑफ फ्लॉवर्स’ सादर करणार आहेत. पेपरपासून थ्रेड पर्यंत डिझाईन त्यांनी केले.
जुबिनव चढ्ढा या लेबलसाठी तयार केलेल्या त्यांच्या डिझाईन्सना परीक्षकांकडून विशेष दाद मिळाली असून प्रसिद्ध फॅशन डिझायनर मनीष मल्होत्रा यांच्या समोर त्यांची निवड होणे हे त्यांच्या कारकिर्दीतील मोठे यश मानले जात आहे.
गुंदेचा यांनी इंडियन ॲकॅडमी ऑफ फॅशन डिझायनिंग येथे रचना काकडे यांच्या मार्गदर्शनाखाली डिप्लोमा पूर्ण केला असून स्कूल ऑफ फॅशन डिझायनिंग पुणे येथून डिग्री मिळवली आहे. सर्व शिक्षक, स्टाफचे त्यांना मार्गदर्शन मिळाले आहे.
विनल गुंदेचा या सहकारमहर्षी स्व. सुवालालजी गुंदेचा यांची नात तर जैन ओसवाल पतसंस्थेचे संचालक मनोज गुंदेचा यांची मुलगी आहे.
या यशामुळे गुंदेचा कुटुंबीयांमध्ये आनंदाचे वातावरण असून विनल यांच्या या यशाबद्दल विविध स्तरातून अभिनंदनाचा वर्षाव होत आहे.
