अहिल्यानगर / नगर सह्याद्री –
शहरातील झेंडीगेट परिसरात गोमांस विक्री केल्याच्या आरोपावरून कोतवाली पोलिसांनी चार जणांना अटक केली असून सुमारे १ लाख ७० हजार ६०० रुपयांचा मुद्देमाल जप्त करण्यात आला आहे.
दि. २० मार्च २०२६ रोजी सायंकाळी सुमारे ५.३० वाजण्याच्या सुमारास पोलीस निरीक्षक संभाजी गायकवाड यांना गोपनीय माहिती मिळाली की, झेंडीगेट येथील बेपारी मोहल्ला, सुबेदार गल्ली येथे गोवंशीय जनावरांच्या मांसाची विक्री सुरू आहे. या माहितीच्या आधारे गुन्हे शोध पथकाने संबंधित ठिकाणी छापा टाकला.
छाप्यात घरामध्ये मोठ्या प्रमाणावर गोमांसाचे तुकडे तसेच गोवंशीय जनावरांचे मुंडके आढळून आले. पोलिसांनी तात्काळ कारवाई करत चार संशयितांना ताब्यात घेतले. अटक करण्यात आलेल्यांची नावे शहेबाज अब्दुलमजीद कुरेशी (वय २९), शान अब्दुल मजीद कुरेशी (वय २६), कैफ अब्दुल मजीद कुरेशी (वय २२) आणि ऐनुर रफिक कुरेशी (वय ३६) अशी आहेत. सर्वजण बेपारी मोहल्ला, आंबेडकर चौक, झेंडीगेट येथील रहिवासी आहेत.
पंचांसमक्ष करण्यात आलेल्या झडतीदरम्यान सुमारे ५०० किलो गोमांस, मटण खिमा मशीन, वजन काटा आणि इतर साहित्य असा एकूण १,७०,६०० रुपयांचा मुद्देमाल जप्त करण्यात आला.
या प्रकरणी कोतवाली पोलीस ठाण्यात गुन्हा दाखल करण्यात आला आहे. पुढील तपास पोलीस हेडकॉन्स्टेबल विनोद बोरगे करीत आहेत.
ही कारवाई पोलीस अधीक्षक सोमनाथ घार्गे, अपर पोलीस अधीक्षक वैभव कलुवमें आणि उपविभागीय पोलीस अधिकारी डॉ. दिलीप टिपरसे यांच्या मार्गदर्शनाखाली पार पडली.
