मुंबई – गुजराती चित्रपटसृष्टीतून आपली ओळख निर्माण करून नंतर बॉलिवूडमध्येही ठसा उमटवणारी अभिनेत्री Janki Bodiwala सध्या चर्चेत आहे. ‘वश’ चित्रपटासाठी राष्ट्रीय पुरस्कार मिळवलेल्या जानकीने Ajay Devgn सोबत Shaitaan या चित्रपटात प्रभावी अभिनय केला. त्यानंतर ती Rani Mukerji सोबत Mardaani 3 मध्ये दमदार भूमिकेत दिसली आहे. अलीकडेच दिलेल्या एका मुलाखतीत तिने शूटिंगदरम्यानचा एक धक्कादायक अनुभव सांगितला.
एका मुलाखतीत बोलताना जानकीने सांगितले की तिने कधीही अभिनेत्री होण्याचा विचार केला नव्हता. ती सुरुवातीला डॉक्टर होण्यासाठी शिक्षण घेत होती. तिच्या वडिलांना चित्रपटांची खूप आवड असल्याने घरी छोटं थिएटरही होतं आणि त्यामुळे लहानपणापासूनच ती चित्रपट पाहत मोठी झाली.
ती डॉक्टरीच्या पहिल्या वर्षात असताना वडिलांनी तिला एका मित्राच्या चित्रपटासाठी ऑडिशन देण्यास सांगितले. सुरुवातीला तिचे ऑडिशन साधारणच झाले होते. मात्र दिग्दर्शक Krishnadev Yagnik यांनी तिला मार्गदर्शन केले आणि तिचा पहिला चित्रपट Chhello Divas सुपरहिट ठरला. त्यानंतर तिने डॉक्टरीचे शिक्षण सोडून अभिनय क्षेत्रात करिअर करण्याचा निर्णय घेतला.
‘शैतान’सारख्या चित्रपटासाठी काम करताना तिला प्रचंड शारीरिक आणि मानसिक थकवा जाणवला. शूटिंगदरम्यान १० ते १५ दिवसांचा ब्रेक मिळाला तेव्हा सुरुवातीला तिला तो ब्रेक अनावश्यक वाटला. मात्र काही दिवसांनी तिला जाणवले की ती पूर्णपणे थकली होती आणि हा ब्रेक तिच्यासाठी खूप गरजेचा होता.
ती म्हणाली, “प्री-क्लायमॅक्सचे शूटिंग झाल्यानंतर मला इतका थकवा जाणवला की क्लायमॅक्ससाठी एनर्जी ठेवण्यासाठी ब्रेक किती महत्त्वाचा होता हे समजले. त्या भूमिकेमुळे माझे शरीर पूर्णपणे थकून गेले होते. शूटिंगदरम्यान मला रोज कुठेतरी जखम व्हायची. माझी आई खूप घाबरायची आणि मी नक्की काय काम करते असा तिला प्रश्न पडायचा.”
