‘ईठा’ चित्रपटाचा टीझर रिलीज / चित्रपटात मराठी कलाकार झळकणार / विठाबाई नारायणगावकर यांच्या भूमिकेत श्रद्धा कपूर
मुंबई / नगर सह्याद्री –
लक्ष्मण उतेकरांचा बहुप्रतीक्षित चित्रपट ‘ईठा’ सध्या चांगलाच चर्चेत आहे. ‘ईठा’ चा अधिकृत टीझर काल रिलीज झाला. हा चित्रपट लावणीसम्राज्ञी विठाबाई नारायणगावकर यांच्या जीवनावर आधारित आहे. श्रद्धा कपूरने चित्रपटात विठाबाईंची भूमिका साकरली आहे. चित्रपटाचे दोन पोस्टरही समोर आले आहेत. ज्यात श्रद्धा कपूरचा कातिल अंदाज पाहायला मिळत आहे. ‘ईठा’ च्या टीझरला भरभरून प्रेम मिळत आहे.
‘ईठा’ च्या टीझरमध्ये श्रद्धा कपूरची ठसकेबाज लावणी पाहायला मिळत आहे. नऊवारी साडी, पायात घुंगरू, केसांत गजरा घालून श्रद्धा कपूर बेभान होऊन नाचताना दिसत आहे. गर्भावस्थेच्या शेवटच्या टप्प्यात असतानाचे दृश्य पाहून अंगावर काटा येतो. विठाबाईंना लावणी सुरू असताना प्रसूती कळा येतात. त्या स्टेजमागे जाऊन बाळाला जन्म देतात आणि पुन्हा स्टेजवर येऊन लावणी सादर करतात. श्रद्धा कपूरने ‘ईठा’ चित्रपटाचे पोस्टर शेअर करून कॅप्शनमध्ये लिहिलं की, “तैयार हो, आ रही है ईठा”
श्रद्धा कपूरसोबत ‘ईठा’ चित्रपटात अनेक मोठे कलाकार पाहायला मिळणार आहे. बलिवूड अभिनेता रणदीप हुड्डा आणि मोहम्मद जीशान अय्यूब हे कलाकार मुख्य भूमिकेत दिसणार आहेत. ‘ईठा’ मध्ये एका मराठी अभिनेत्याची वर्णी लागली आहे. हा अभिनेता दुसरा-तिसरा कोणी नसून सिद्धार्थ जाधव आहे. जो ढोलकी वाजवताना दिसत आहे. मात्र त्याच्या भूमिकेचे नाव अद्याप समोर आले नाही. मात्र टीझरमध्ये सिद्धार्थ जाधवला पाहून चाहते खूपच खुश झाले आहेत. चित्रपटात नाना पाटेकरही दिसणार असल्याचे बोले जात आहे. ‘ईठा’ हा चित्रपट २८ ऑगस्टला रिलीज होणार आहे. मीडिया रिपोर्टनुसार, ‘ईथा’ चित्रपटाचे शूटिंग नाशिक, सातारा येथे झाले आहे.
