मुंबई / नगर सह्याद्री –
बॉलिवूड आणि दक्षिण भारतीय चित्रपटसृष्टीतील लोकप्रिय अभिनेत्री Rashmika Mandanna सध्या एका नव्या वादामुळे चर्चेत आली आहे. तिचे काही कथित प्रायव्हेट चॅट्स सोशल मीडियावर लीक झाल्याचा दावा केला जात असून, त्यासोबतच तिची आई सुमन मंदाना यांची एक ऑडिओ क्लिपही व्हायरल होत आहे. या प्रकरणामुळे सोशल मीडियावर मोठी चर्चा रंगली आहे.
अलीकडेच रश्मिका मंदाना आणि अभिनेता Vijay Deverakonda यांनी विवाह केल्याची चर्चा सोशल मीडियावर रंगली होती. त्यांच्या लग्नाचे फोटो आणि व्हिडिओ मोठ्या प्रमाणात व्हायरल झाले. मात्र याच दरम्यान रश्मिकाच्या वैयक्तिक आयुष्याशी संबंधित काही गोष्टी इंटरनेटवर समोर आल्याने वाद निर्माण झाला आहे.
व्हायरल होत असलेल्या ऑडिओ क्लिपमध्ये रश्मिकाची आई सुमन मंदाना रश्मिकाच्या भूतकाळातील नात्याबद्दल बोलताना ऐकू येत असल्याचा दावा केला जात आहे. रश्मिकाचा यापूर्वी अभिनेता Rakshit Shetty याच्यासोबत साखरपुडा झाला होता. या क्लिपमध्ये हे नातं का तुटलं आणि त्या काळात रश्मिकावर अभिनय सोडण्यासाठी दबाव टाकण्यात येत होता, असा उल्लेख असल्याचं सांगितलं जात आहे.
माहितीनुसार ही ऑडिओ क्लिप सुमारे आठ वर्षांपूर्वी दिलेल्या एका मुलाखतीतील असल्याचा दावा केला जात आहे. मात्र रश्मिकाने सोशल मीडियावर पोस्ट करत या प्रकाराबद्दल नाराजी व्यक्त केली आहे.
तिने स्पष्ट शब्दांत सांगितले की, तिच्या खासगी आयुष्याशी संबंधित अशा प्रकारचा कंटेंट सोशल मीडियावर शेअर करणे चुकीचे आहे. संबंधित व्हिडिओ आणि पोस्ट हटवण्यात आले नाहीत तर कायदेशीर कारवाई करण्याचा इशाराही तिने दिला आहे.
दरम्यान, या प्रकरणामुळे सोशल मीडियावर वेगवेगळ्या प्रतिक्रिया उमटत असून, चाहत्यांमध्येही चर्चेला उधाण आले आहे.
