पुणे। नगर सहयाद्री:-
राज्यात निवडणुकांचे बिगुल वाजले असून आचारसंहिता सुरु झाली आहे. सर्वत्र नाकाबंदी आणि तपासण्या होत आहेत. प्रशासनाकडून निवडणुकीमध्ये पैसे आणि गैरव्यवहार होऊ नये यासाठी मोठे प्रयत्न सुरू आहेत. दरम्यान पुणे पोलिसांच्या नाकाबंदीत 138 कोटींचे सोने पकडले गेले आहे. आज सकाळी मोठी कारवाई करण्यात आली आहे.
अधिक माहिती अशी: निवडणुकीच्या पार्श्वभूमीवर पुणे शहरात जागोजागी पोलिसांनी नाकाबंदी केली आहे. दरम्यान सकाळी ८ वाजण्याच्या सुमारास तपासणीवेळी एक टेम्पो अडवला. त्यामध्ये पांढऱ्या पोत्यात बॉक्स आढळले, त्यामध्ये तब्बल 138 कोटी रुपये किमतीचे सोने या टेम्पो मध्ये आढळून आले आहे. पुण्यातील सहाय्यक पोलीस आयुक्त कार्यालयात हा टेम्पो नेण्यात आलेला आहे.
हे जवळपास १३८ कोटी रूपयांचं सोनं असल्याची माहिती समोर आली आहे. ताब्यात घेतलेला हा टेम्पो एका खाजगी लॉजिस्टिक कंपनीचा असून यामधील सोनं पुण्यातील कुठल्या व्यापाऱ्याकडे जात होतं याचा तपास सध्या सुरू असून पोलिसांनी चालक आणि आणखी एक जणास ताब्यात घेतले आहे. त्यांच्याकडे चौकशी सुरु आहे. हे जवळपास १३८ कोटी रूपयांचं सोनं असल्याची माहिती समोर आली आहे.
