अहमदनगर / नगरसह्याद्री : अहमदनगर जिल्ह्यातील लोकसभेची सर्वच पक्षांकडून जय्यत तयारी सुरु आहे. त्यात नगर दक्षिणेची जागा आता चांगलीच प्रतिष्ठेची होईल असे दिसते. कारण यात भाजप उमेदवार सुजय विखे व त्यांच्याविरोधात आ. निलेश लंके असतील असे चित्र सध्या तरी आहे.
दरम्यान आता लोकसभेविषयी आ. लंके यांनी केलेल्या राजकीय वक्तव्यानंतर चर्चांना उधाण आले आहे. ते म्हणाले आहेत की, लोकसभा निवडणूक लढवणारच, या जिल्हा परिषदेच्या माजी सदस्या राणी लंके यांच्या जाहीर वक्तव्याबद्दल ‘ध’ चा ‘मा’ झाला आहे. प्रत्येक कुटुंबात वेगवेगळे मतप्रवाह असतात व तो पत्नी राणी लंके यांचा मतप्रवाह आहे, असेही त्यांनी आवर्जून स्पष्ट केले.
* काय म्हणाले आ. निलेश लंके
माझी पत्नी राणी लंके यांनी लोकसभा निवडणूक लढवणारच, अशा केलेल्या घोषणेबद्दल ‘ध’ चा ‘मा’ झाला आहे. प्रत्येक कुटुंबात वेगवेगळे मतप्रवाह असतात, तसा तो आमच्याही आहे. पत्नी राणी यांचे ते वेगळे मत आहे. मी उपमुख्यमंत्री अजित पवार यांचा आज्ञाधारक कार्यकर्ता आहे. पक्षश्रेष्ठींनी आदेश दिला तर कोणतीही निवडणूक मी लढवू शकतो. मात्र, लोकसभेच्या माझ्या उमेदवारीबाबत मला विचारणाही झाली नाही व कोणाशी माझी चर्चाही झालेली नाही असे लंके यांनी स्पष्ट केले.
* पत्नीच्या शिवस्वराज्य यात्रेत हस्तक्षेप केला नाही
दरम्यान राणी लंके यांनी काढलेल्या शिवस्वराज्य यात्रेत हस्तक्षेप केला नसल्याचे ते म्हणाले. शिवस्वराज्य यात्रेचे संयोजन राणी लंके यांनी सक्षमपणे केले. यात्रेला प्रतिसाद मिळाल्याने त्यांच्या कष्टाचे चीज झाले. यात्रेचे नियोजन माझ्याकडे नव्हते व आपल्या उपस्थितीने यात्रेत हस्तक्षेप नको म्हणून समारोपाला आलो असे ते म्हणाले.
