पारनेर | नगर सह्याद्री:-
महाविकास आघाडीतील राष्ट्रवादी शरद पवार गटाच्या उमेदवार राणीताई लंके यांच्या विरोधात कोण याबाबतची उत्सुकता अखेर संपली असल्याचे मानले जात आहे. माजी नगराध्यक्ष विजय सदाशिव औटी यांना अजित पवार गटाने उमेदवारी जाहीर केली असल्याची माहिती समोर आली आहे. लोकसभेत नीलेश लंक यांनी बाजी मारल्यानंतर या मतदारसंघात महायुतीचा उमेदवार तोडीस तोड देण्याबाबत खल सुरू होता.
जिल्हा परिषदेचे माजी उपाध्यक्ष सुजित झावरे आणि माजी सभापती काशिनाथ दाते यांचीही नावे चर्चेत होती. मात्र, तोडीस तोड आणि तरुणांना आकर्षित करू शकणारा चेहरा म्हणून विजय सदाशिव औटी यांचे नाव अंतिम केल्याची माहिती अधिकृत सुत्रांकडून पुढे आली आहे.
माजी नगराध्यक्ष असलेले विजय औटी यांचा तरुणांचा मोठा संग्रह आहे. लंके यांना तोडीस तोड उमेदवार देण्यात आल्याने आता ही लढत चुरशीची होणार असल्याचे मानले जाते. दरम्यान, उमेदवारी नाकारलेले सुजित झावरे व त्यांचे समर्थक काय भूमिका घेतात यावर बरेच काही अवलंबून असणार आहे.
