मुंबई / नगर सह्याद्री
राष्ट्रवादीचे आ. रोहित पवार यांची मागील आठवड्यात ईडीची चौकशी करण्यात आली होती. आज पुन्हा त्यांची चौकशी करण्यात येत आहे. मागील वेळी राष्ट्रवादीचे सर्वेसर्वा शरद पवार हे त्यांच्यासोबत होते. यावेळी त्यांच्या आजी प्रतिभाताई पवार त्यांना साथ देणार आहेत. रोहित पवार यांची ईडीची चौकशी होईपर्यंत त्या राष्ट्रवादीच्या कार्यालयात ठाण मांडून बसणार आहेत.
रोहित पवार यांच्यावर ईडीकडून करण्यात येत असलेल्या कारवाईमुळे राष्ट्रवादीच्या कार्यकर्त्यांमध्ये नाराजी आहे. अनेक कार्यकर्ते आक्रमक झाले आहेत. या कार्यकर्त्यांनी राष्ट्रवादीच्या प्रदेश कार्यालयात गर्दी केली आहे. या कार्यकर्त्यांनी ईडीच्या या कारवाईविरोधात प्रदेश कार्यालयाबाहेर आंदोलन सुरु केलं. यावेळी रोहित पवारांनी त्यांना आंदोलन न करण्याची विनंती केली.
रोहित पवार आज ईडी कार्यालयात चौकशीला जाण्यापूर्वी राष्ट्रवादी काँग्रेस प्रदेश कार्यालयात आले. त्यावेळी त्यांनी कार्यकर्त्यांशी संवाद साधला. विशेष म्हणजे रोहित पवार यांना पाठिंबा देण्यासाठी त्यांच्या आजी आणि शरद पवार यांच्या पत्नी प्रतिभा पवार या स्वत: आज राष्ट्रवादीच्या प्रदेश कार्यालयात आल्या. त्यांनी रोहित पवारांना आशीर्वाद दिला.
प्रतिभा पवार आज दिवसभर रोहित पवार यांची ईडी चौकशी पूर्ण होत नाही तोपर्यंत राष्ट्रवादीच्या प्रदेश कार्यालयात राहणार आहेत. प्रतिभा पवार यांच्यासह रोहित पवार यांचे वडील राजेंद्र पवार हे देखील आज राष्ट्रवादीच्या प्रदेश कार्यालयात ठाण मांडून बसणार आहेत. रोहित पवार ईडी कार्यालयात जात असताना त्यांच्यासोबत त्यांच्या पत्नी कुंती पवार आणि बहीण रेवती सुळे या देखील प्रदेश कार्यालयात उपस्थित होत्या.
