शेवगाव : आमदार सत्यजित तांबे यांची शेवगावमध्ये ‘पुस्तक तुला’ करण्यात आली. शेवगावचे नगरसेवक रिंकू कलके आणि ग्रामस्थांनी मंगळवारी हा सन्मान केला. विविध व्यासपीठांवरून तरुणाईला शिक्षणाचं आणि वाचनाचं महत्व पटवून देणाऱ्या आ. तांबे यांच्या कारकि‍र्दीत एक अनोखा सन्मान त्यांना प्राप्त झाल्याची भावना यावेळी अनेकांनी व्यक्त केली.
आमदार सत्यजित तांबे शेवगावच्या दौऱ्यावर असताना त्यांनी राजीव राजळे मित्रमंडळ आयोजित ‘राजीव बुक फेस्ट २०२३’ या पुस्तक प्रदर्शनाला भेट दिली. या वेळी शेवगावचे नगरसेवक रिंकु कलके आणि ग्रामस्थांनी आमदार सत्यजीत तांबे यांची ‘पुस्तक तुला’ केली.
या पुस्तक तुलेसाठी वापरलेली पुस्तके विविध संस्थां आणि गरजू विद्यार्थ्यांना दान करण्यात येतील. या वेळी आमदार तांबे यांना ‘ज्ञान उपासना सन्मान’ प्रदान करण्यात आला.
यावेळी आ. सत्यजित तांबे म्हणाले की, पुस्तक हे माणसाचे आयुष्य घडवते. त्यामुळे वाचन संस्कृती जपली पाहिजे असं ते म्हणाले. तर वाचन संस्कृतीचा वारसा पुढे नेण्याच काम आ. सत्यजीत तांबे करत असल्याची भावना कलके यांनी व्यक्त केली.
