मुंबई / नगर सह्याद्री : राजकरणात विविध घडामोडी घडत असतात. परंतु आता एका घटनेने राजकरणात खळबळ उडाली आहे. ते ही एका ट्विट केलेल्या फोटोमुळे. फोटोत जुगार खेळणारी व्यक्ती भाजपचे प्रदेशाध्यक्ष चंद्रशेखर बावनकुळे असल्याची चर्चा राजकीय वर्तुळात सुरु झाली आहे.
पहा नेमके काय घडलेय?
खासदार संजय राऊत यांनी एक फोटो ट्विट केलाय. याने महाराष्ट्रातील राजकीय वातावरण ढवळून निघालं आहे. संजय राऊत यांनी एका कॅसिनोमधील फोटो ट्विट केलाय. या फोटोमधील व्यक्तीने एका रात्रीत 3.50 कोटी रुपये कॅसिनो जुगारात उडवले, असं प्रत्यक्षदर्शी सांगतात, असा दावा संजय राऊतांनी केलाय.
“हिंदुत्ववादी असल्याने महाशय द्युत… खेळले तर बिघडले कोठे? ते तेच आहेत ना?”, असा सवाल संजय राऊत यांनी या ट्विटद्वारे केला आहे. त्यांच्या या ट्वीटमुळे एकच खळबळ उडाली असून आता भाजपच्या अधिकृत ट्विटर अकाउंटवर त्यावर स्पष्टीकरण देण्यात आलं आहे.
भाजपकडून स्पष्टीकरण
“आमचे प्रदेशाध्यक्ष चंद्रशेखर बावनकुळे त्यांच्या आयुष्यात कधी जुगार खेळलेले नाहीत. ते ज्या हॉटेलमध्ये सहकुटुंब मुक्कामी तेथील हा परिसर. असो, ज्यांच्या आयुष्याचा जुगार झालाय, त्यांची दृष्टी त्यापलिकडे जाऊ शकत नाही.
आम्हाला फक्त एक सांगा संजुभाऊ आदित्यच्या या ग्लासमध्ये कोणत्या ब्रँडची व्हीस्की?”, असा सवाल करत भाजपने संजय राऊतांच्या ट्विटला प्रत्युत्तर दिलं आहे.
