जालना / नगर सह्याद्री : मनोज जरांगे पाटील हे मराठा आरक्षण मागणीसाठी आंदोलनाला बसले आहे. त्यांचा आजचा सहावा दिवस आहे. ते पाणीही घेत नाहीयेत. परंतु आज त्यांची तब्येत खालावली आहे. ते आज स्टेजवरच कोसळल्याचा व्हिडीओ समोर येत आहे.
अंतरावाली-सराटी गावात मनोज जरांगे पाटील यांच आमरण उपोषण सुरु असून अन्न-पाणी सोडलय. त्यामुळे त्यांच्या तब्येतीवर गंभीर परिणाम झाला आहे. स्टेजवर उभे असताना ते कोसळले. त्यामुळे आंदोलनात जमलेले ग्रामस्थ आक्रमक झाले होते. एक मराठा-लाख मराठा या घोषणा दिल्या.
मनोज जरांगे पाटील यांना पाणी पिण्याचे आवाहन ग्रामस्थ करत आहेत. लवकरच ते प्रसारमाध्यमांशी संवाद साधणार आहेत. आज सकाळपासून ते झोपून आहेत. कालही त्यांनी माइक हातात घेतला तेव्हा त्यांचा हात थरथरत होता.
‘पाणी घ्या, पाणी घ्या, जरांगे पाटील पाणी घ्या’ अशी घोषणाबाजी गावकऱ्यांकडून सुरु आहे. त्यांच्यासाठी एक मुलगी पाण्याची बाटली घेऊन आली आहे, पण मनोज जरांगे पाटील यांनी पाणी घेतलेले नाही. मनोज जरांगे पाटील हे उपचारही घेत नाहीत. “समाजाच तुम्हाला ऐकावच लागेल. आज तुम्हाला पाणी प्यावच लागेल असा आवाज समोर असलेल्या गर्दीतून आला. त्यावर ठिकय, मी चार-पाच घोट पाणी पीतो” असं जरांगे पाटील म्हणाले.
