नेवासा / नगर सह्याद्री –
राज्यात सत्तांतर घडवून आणण्यासाठी पद आणि खोक्यांच्या मोहात न पड़ता आमदार शंकरराव गडाख यांनी ठाकरे यांना साथ दिली. ही निष्ठा मतदारांनी लक्षात घ्यावी आणि मशाल चिन्ह असलेल्या उमेदवारांना साथ द्यावी, असे आवाहन ज्येष्ठ साहित्यिक व माजी खासदार यशवंतराव गडाख यांनी केले.
नेवासा विधानसभा मतदारसंघातील महाविकास आघाडीचे उमेदवार शंकरराव गडाख यांच्या प्रचारार्थ सोनईत झालेल्या स्नेहमेळाव्यात ज्येष्ठ नेते गडाख बोलत होते. ज्येष्ठ नागरिक कन्हैयालाल चंगेडिया, विजय भळगट, मदनलाल बंग, विश्वासराव गडाख, नंदकिशोर अट्टल आदी उपस्थित होते.
गडाख म्हणाले, महाराष्ट्र राज्याला एका चांगल्या उंचीवर नेऊ शकणारे नेतृत्व म्हणजे उद्धव ठाकरे हेच आहेत. आयुष्यातील राजकारणात मोजक्याच व्यक्ती भावल्या, त्यांत ठाकरे आहेत. सोनईत साखर कारखानदारी व शैक्षणिक संस्था केल्याने ग्राहकांची क्षमता वाढली. परिणामी येथील व्यापार वाढला आहे. जनतेने आपणाला विकास कामात सतत साथ दिली. मागे खेचले नाही, असेही त्यांनी सांगितले.
