Accident News: रेणुका मातेचे दर्शन घेण्यासाठी माहुर गडावर गेलेलया भाविकांच्या कारचा अपघात झाल्याची घटना समोर आली आहे. अपघातात अहमदनगर मधील दोघेजण जागीच ठार तर सहाजण गंभीर जखमी झाले आहे. हा अपघात आज सोमवारी ७ च्या सुमारास यवतमाळ जिल्ह्यातील पुसद-वाशिम महामार्गावरील सत्तरमाळ घाटात घडला आहे.
अहमदनगर येथील ८ भाविक रेणुका मातेचे दर्शन घेण्यासाठी माहुर गडावर गेले होते. दर्शन घेऊन पुसद मार्ग ते नगरकडे परतत होते. पुसद-वाशिम महामार्गावरील सत्तरमाळ घाटात कार आली असता, अचानक चालकाचे गाडीवरील नियंत्रण सुटले. काही क्षणातच कार रस्त्याच्या कडेला असलेल्या झाडावर जाऊन आदळली. अपघात इतका भीषण होता की, कारचा अक्षरश: चक्काचूर झाला. या घटनेत दोन भाविकांचा घटनास्थळीच मृत्यू झाला तर सहा जण जखमी झाले आहे.
अपघाताची माहिती मिळताच पोलिसांनी घटनास्थळी धाव घेत बचावकार्य केले. जखमींना तातडीने उपचारासाठी रुग्णालयात दाखल करण्यात आलं आहे. काहींची प्रकृती चिंताजनक असल्याचं बोललं जातं आहे. अद्याप मृतक आणि जखमी यांची नावे कळू शकली नाही.
