अहमदनगर / नगरसह्याद्री :
Ahmednagar News : नगर तालुक्यातील देहरे गावातील सराफ दुकान फोडल्याची घटना काल (दि.१९ डिसेंबर) रात्री घडली. मध्यरात्रीच्या सुमारास चोरटयांनी दुकानात प्रवेश करत दागिने चोरले. दुसऱ्या एका दुकानाचे शटर उचकले होते.
यात सहा ते सात हजारांचे दागिने चोरीला गेल्याची प्राथमिक माहिती मिळाली आहे. सकाळी ही घटना उघडकीस आली. घटनेची माहिती मिळताच एमआयडीसी पोलीस घटनास्थळी दाखल झाले. दुपारी उशिरापर्यंत पंचनामा व तपासाचे काम सुरु होते.
अहमदनगर शहरात सराफ बाजारातील वर्मा ज्वेलर्सचे दुकान फोडल्याची घटना ताजी असतानाच आता ही घटना घडली. भर शहरातून वर्मा ज्वेलर्समधून लाखोंचे दागिने चोरटयांनी लांबवले होते. यातील आरोपींना पोलिसांनी बेड्या घातल्या होत्या.
परंतु आता पुन्हा एकदा सराफाचे दुकान फोडल्याने सराफ व्यावसायिक चिंतीत झाले आहेत. पोलिसांनी चोरट्यांचा बंदोबस्त करावा, गस्त वाढवावी अशी मागणी केली जात आहे.
