पुणे / नगर सह्यादी : लोकसभा निवडणुकीला काही महिन्यांचाच अवधी राहिला आहे. राजकारणात त्यामुळे अनेक ट्विस्ट पाहायला मिळत आहेत.
राजकीय उलथापालथीमुळे मतदारसंघांतील समीकरणे बदलली आहेत. आता आणखी एक ट्विस्ट समोर आला आहे. मुख्यमंत्री एकनाथ शिंदे यांच्या नेतृत्वाखालील शिवसेनेचे नेते आणि माजी खासदार शिवाजीराव आढळराव पाटील हे राष्ट्रवादीच्या अजित पवार गटाकडून आगामी लोकसभा निवडणूक लढवू शकतात, अशी चर्चा राजकीय वर्तुळात सुरू झाली आहे.
ते शिरूर मतदार संघात येतात. एकनाथ शिंदे यांनी शिवसेनेत बंड केल्यानंतर शिवाजीराव आढळराव पाटील शिंदे गटात गेले. शिरूर लोकसभा मतदारसंघातून आढळराव पाटील तीन वेळा खासदार राहिले आहेत.
पण आता या लोकसभेवर भाजपकडून दावा सांगितला जातोय. भाजप आमदार महेश लांडगे हे या मतदारसंघातून लोकसभा निवडणूक लढवण्यासाठी तयारी करत असल्याची चर्चा कायम रंगत असते. दुसरीकडे, राष्ट्रवादीत बंड झाल्यानंतर खासदार डॉ. अमोल कोल्हे हे शरद पवार गटात गेले.
सध्या या मतदारसंघात राष्ट्रवादीचा खासदार असल्याने लोकसभा निवडणुकीवेळी महायुतीच्या जागावाटपात अजित पवार यांच्याकडून या जागेवर दावा सांगितला जाऊ शकतो. त्यामुळे कोल्हे यांच्याविरोधात लढण्यासाठी आढळराव पाटील हे राष्ट्रवादी अजित पवार गटाचाही विचार करू शकतात. परंतु या घडामोडींवर मात्र त्यांनी प्रतिक्रिया देणार नसल्याचं सांगितलं आहे.
