अहमदनगर । नगर सहयाद्री:-
येथील एका महाविद्यालयच्या गेटसमोर १७ वर्षीय विद्यार्थिनीला अडवून तिची छेडछाड केल्याचा धक्कादायक प्रकार आहे. याप्रकरणी तोफखाना पोलिस ठाण्यातदिलेल्या फिर्यादीनुसार एका तरुणा विरोधात गुन्हा दाखल करण्यात आला आहे. कृष्णा किरण कांबळे (रा. प्रबुद्ध नगर, भिंगार) असे या गुन्हा दाखल झालेल्या तरुणाचे नाव आहे.
अधिक माहिती अशी: १२ जुलै रोजी १७ वर्षीय विद्यार्थिनी नेहमी प्रमाणे लालटाकी परिसरातील एका महाविद्यालयात गेली होती. दुपारी ४ वाजता परतत असताना महाविद्यालयाच्या गेटसमोर आरोपी कृष्णा कांबळे याने तरुणीला अडवले तुझ्याशी बोलायचे आहे. मला तुला भेटायचे आहे, माझ्या सोबत चल असे तो म्हणाला.त्यास त्या तरुणीने नकार दिल्यावर त्याने तिचा हात पकडून तिच्या सोबत छेडछाड केली.
विद्यार्थिनी सदर प्रकरणामुळे खूप घाबरली होती. तिने भितीपोटी घरी कुणाला ही काही सांगितले नाही. भीती कमी झाल्यावर तिने कुटुंबियांना घडलेला प्रकार सांगितला. त्यानंतर शुक्रवारी दि. १९ जुलै रोजी कुटुंबियांनी पोलीस ठाण्यात धाव घेत फिर्याद दिली. या फिर्यादी वरून पोलिसांनी आरोपी कृष्णा कांबळे विरुद्ध पोक्सो सह विनयभंगाचा गुन्हा दाखल केला आहे.
