अहमदनगर। नगर सहयाद्री
वाळू तस्करांच्या मुसक्या आवळण्यासाठी वाळूतस्करांच्या विरोधात आता थेट एमपीडीए कायद्यांतर्गत कारवाई करण्यात येत आहे. सर्वसामान्य लोकांवर दहशत निर्माण करणारा वाळूतस्कर आशीफ शमशुद्दीन तांडेल (वय ३० रा. तांडेलगल्ली, पेडगाव) याच्यावर ‘एमपीडीए’ कायद्यान्वये कारवाई करण्यात अली असून त्याची रवानगी नाशिकच्या कारागृहात करण्यात आली आहे. जिल्हाधिकारी सिध्दाराम सालीमठ यांनी आदेश दिले आहेत.
सराईत गुन्हेगार तांडेल यांच्यावर गैरकायद्याची मंडळी जमवून शिवीगाळ करून मारहाण करणे, मालमत्ता जबरीने घेण्यासाठी दुखापत करणे, सरकारी नोकरांवर हल्ला करणे, शासकीय वाळू चोरी करणे असे गंभीर स्वरूपाचे गुन्हे दाखल आहेत.
त्याच्या समाजविघातक कृत्याला आळा घालण्यासाठी श्रीगोंदा पोलिसांनी ‘एमपीडीए’ कायद्यान्वये प्रस्ताव तयार करून पोलीस उपअधीक्षक, कर्जत विभाग व अपर पोलीस अधीक्षक यांच्या मार्फत पोलीस अधीक्षक राकेश ओला यांच्याकडे पाठविला होता.
सदर प्रस्तावाची अधीक्षक ओला यांनी बारकाईने पडताळणी करून सदरचा प्रस्ताव हा शिफारसअहवालासह जिल्हाधिकारीसालीमठ यांच्याकडे सादर केला होता. जिल्हाधिकारी सालीमठ यांनी सदर प्रस्तावाची पडताळणी करून जिल्ह्यातील सार्वजनिक सुव्यवस्था अबाधित राहावी याकरिता तांडेल विरोधात स्थानबध्द करणेबाबत आदेश काढले आहेत.
