नवी दिल्ली / नगरसहयाद्री : संसदेत घुसखोरी प्रकरणावरून वातावरण चांगलेच तापले आहे. संसदेतील सुरक्षायंत्रणा भेदण्याच्या मुद्द्यावरुन केंद्रीय गृहमंत्री अमित शहा यांनी सदेत येऊन निवेदन करावे, या मागणीसाठी विरोधी खासदार गदारोळ घालत आहेत.
त्यामुळे दोन्ही सभागृहातील खासदानवर निलंबनाची कारवाई सुरु आहे. आज. खा. सुप्रिया सुळेंसह लोकसभेतील ४९ खासदारांना आज निलंबित करण्यात आले. लोकसभा आणि राज्यसभेतून सोमवारी विरोधी पक्षांच्या तब्बल ७८ खासदारांना अधिवेशनकाळासाठी निलंबित करण्यात आले होते.
त्यानंतर आज लोकसभेच्या आणखी ४९ खासदारांचे निलंबन करण्यात आले. एकाच अधिवेशनात विरोधी पक्षांच्या खासदारांना एवढ्या मोठ्या संख्येने संसदेबाहेरचा रस्ता दाखवण्याचा देशाच्या संसदीय इतिहासातील हा पहिलाच प्रसंग असल्याचे बोलले जात आहे.
खासदार सुप्रिया सुळे यांनी संतप्त प्रतिक्रिया दिली आहे. त्या म्हणाल्या, लोकशाहीच्या मार्गानं आम्ही निवडून आलो आहोत पण दडपशाही सुरु झाली आहे. आतापर्यंत १०० पेक्षा जास्त खासदार निलंबीत केले गेले आहेत. संसदेत झालेल्या घुसखोरी प्रकरणी आम्ही चर्चेची मागणी केली. पण प्रश्न विचारणारे बाहेर आहेत. सत्ताधाऱ्यांना विरोधक नको आहेत, त्यामुळे निलबंनाची कारवाई करण्यात आली असल्याचे त्या म्हणाल्या आहेत.
