अहमदनगर। नगर सहयाद्री-
नगर तालुक्यातील एका गावात पती-पत्नी सोबत धक्कादायक प्रकार घडल्याची बातमी समोर आली आहे. रविवार दि. २९ रोजी दुपारच्या सुमारास ही घटना घडली आहे. याप्रकरणी महिलेच्या फिर्यादीवरून बाबु काळे व सुनील काळे यांच्या विरोधात गुन्हा दाखल करण्यात आला आहे.
सविस्तर: फिर्यादी महिला व तिचा पती रविवारी दुपारी त्यांच्या दुकानात असताना बाबु काळे व सुनील काळे दुकानावर आले. बचत गटातील महिलांना शिर्डीला का नेले, असे म्हणून फिर्यादीच्या पतीला शिवीगाळ करत लाकडी दांडक्याने मारहाण केली. फिर्यादीच्या हाताला धरून लज्जा उत्पन्न होईल, असे वर्तन करत दुकानातून बाहेर काढून दिले.
लाकडी दांडक्याने दुकानाच्या काऊंटरच्या काचा फोडून मारहाण करत तुम्हाला जे करायचे ते करा, आम्ही कुणाला घाबरत नाही, तुम्हाला पाहून घेऊ, अशी धमकी दिली असल्याचे फिर्यादीत म्हटले आहे.
