मुंबई / नगर सहयाद्री टीम : सध्या आंतरराष्ट्रीय राजकारणात मालदीव हा विषय चर्चेचा झाला आहे. मालदीवच्या तीन मंत्र्यांनी पंतप्रधान मोदींविरोधात सोशल मीडियावर आक्षेपार्ह वक्तव्य केल्यानंतर वातावरण तापले. सोशल मीडियावरही बायकॉट मालदीव ट्रेंड करत असल्याचेच दिसत असून या प्रकरणी शरद पवार यांनी PM मोदींना पाठिंबा दर्शवला आहे. राष्ट्रवादी काँग्रेसचे प्रमुख शरद पवार यांनी या प्रकरणावर तीव्र नाराजी व्यक्त केली आहे.
शरद पवार म्हणाले की, ‘नरेंद्र मोदी हे आपल्या देशाचे पंतप्रधान आहेत. इतर देशातील कोणी आपल्या देशाच्या पंतप्रधानांविरोधात बोलत असेल, तर ते आम्ही खपवून घेणार नाही. आपल्या देशात त्यांच्याशी कितीही मतभेद असले तरी, इतर देशांतील लोक आपल्या पंतप्रधानांबद्दल बोलू शकत नाहीत,’ अशी प्रतिक्रिया शरद पवारांनी दिली.
निवडणुकीबाबत वक्तव्य
खासदरकीचा सध्याचा कार्यकाळ संपल्यानंतर मी निवडणूक लढवणार नाही. अडीच वर्षांनंतर माझी खासदारकी संपेल. त्यानंतर निवडणूक लढवणार नाही. माझी खासदारकीची टर्म शिल्लक असून तोपर्यंत काम करत राहणार आहे. मला लोकांनी तिथे पाठवले आहे. तिथे काम करु नको का? असा सवालही त्यांनी केला आहे.
