अहमदनगर | नगर सह्याद्री –
युवकाला धारदार हत्याराचा धाक दाखवून ४० हजार रूपये किमतीचे १६.५९० ग्रॅम सोन्याचे ब्रेसलेट बळजबरीने चोरून नेले. १५ नोव्हेंबरला रात्री साडेआठच्या सुमारास वडगाव गुप्ता (ता. नगर) शिवारात आठरे पाटील स्कूलकडे जाणार्‍या रस्त्यावर ही घटना घडली.
या प्रकरणी फरहान अल्लाबक्ष दलवाई (वय २३ रा. ढवण वस्ती, सावेडी) यांनी एमआयडीसी पोलीस ठाण्यात दिलेल्या फिर्यादीवरून दोन अनोळखी विरोधात गुन्हा दाखल झाला आहे. १५ नोव्हेंबरला रात्री साडेआठच्या सुमारास फरहान अल्लाबक्ष दलवाई त्यांच्या दुचाकीवरून वडगाव गुप्ता गावाकडे आठरे पाटील स्कूल रस्त्यावरून जात असताना त्यांना दोन इसमांनी दुचाकी आडवी लावली.
त्या इसमांनी धारदार हत्याचाराचा धाक दाखवून दलवाई यांच्याकडील ४० हजार रूपये किमतीचे १६.५९० ग्रॅमचे सोन्याचे ब्रेसलेट बळजबरीने काढून घेतले. घाबरलेल्या दलवाई यांनी याची माहिती नातेवाईकांना दिली. दुसर्‍या दिवशी एमआयडीसी पोलिसांना घटनेची माहिती देत गुन्हा दाखल केला.
