पारनेर । नगर सहयाद्री:-
गोरेश्वर ग्रामीण पतसंस्थेच्या संचालक मंडळ निवडणुकीने जिल्ह्याचे लक्ष वेधले. या निवडणुकीत विद्यमान सत्ताधारी बाजीराव पानमंद यांच्या नेतृत्वाखालील गोरेश्वर सहकार संस्थापक पॅनलने सर्व 11 जागांवर 300 हून अधिक मतांच्या आघाडीने दणदणीत विजय मिळवला. विरोधी गोरेश्वर सहकार बचाव पॅनलचे नेते बाबासाहेब तांबे यांनी गोरेगाव मतदान केंद्रात पानमंद यांच्या गटाला आघाडीपासून रोखण्यात यश मिळवले. मात्र, भाळवणी आणि ढवळपुरी या मतदान केंद्रांवर पानमंद यांच्या पॅनलने निर्णायक आघाडी घेतली, जी त्यांच्या विजयाचा मार्ग मोकळा करणारी ठरली.
बाबासाहेब तांबे यांच्या पॅनलला कर्जुले हर्या आणि राळेगण थेरपाळ येथील मतदान केंद्रांमधून मोठी आघाडी मिळाली, जी शेवटपर्यंत कायम राहिली. तरीही, इतर मतदान केंद्रांवर पानमंद यांच्या पॅनलने बाजी मारली. या विजयाने गोरेश्वर पतसंस्थेची सत्ता पुन्हा पानमंद यांच्या ताब्यात आली आहे. आता त्यांच्यासमोर ठेवीदारांचा विश्वास पुन्हा संपादन करण्याचे मोठे आव्हान आहे.निवडणुकीत एकूण मतदान प्रक्रिया शांततेत पार पडली. पानमंद यांच्या पॅनलने सातत्याने मतदारांशी संवाद साधून आणि आपल्या कामाचा लेखाजोखा मांडून विश्वास संपादन केला. दुसरीकडे, तांबे यांच्या पॅनलने काही ठिकाणी चांगली लढत दिली, परंतु सर्व मतदान केंद्रांवर एकसमान कामगिरी करण्यात ते कमी पडले. या निवडणुकीने स्थानिक राजकारणातही नवे समीकरण निर्माण केले आहे.
पानमंद यांचा विजय हा त्यांच्या धोरणात्मक नियोजन आणि कार्यकर्त्यांच्या मेहनतीचे फळ मानला जात आहे. आगामी काळात पतसंस्थेच्या विकासासाठी आणि ठेवीदारांच्या हितासाठी पानमंद यांच्या पॅनलला ठोस पावले उचलावी लागतील, अशी अपेक्षा मतदारांमध्ये आहे.
बाजीराव पानमंद यांच्या गोरेश्वर सहकार संस्थापक पॅनलचे विजयी सर्व 11 उमेदवार
सर्वसाधारण मतदारसंघ
सखाराम खोडदे 3808आप्पा थोरात 3808 अंबादास नरसाळे 3810, शिवाजी नरसाळे 3768 बाजीराव पानमंद 3805 संदीप रोहकले 3592
महिला राखीव मतदार संघ
स्नेहल आमले 4031 प्रीती पानमंद 4057
अनुसूचित जाती जमाती राखीव मतदारसंघ
चंद्रभान शेलार 4037
इतर मागासवर्गीय राखीव मतदार संघ
प्रशांत चौरे 3972
भटक्या विमुक्त जाती जमाती विशेष मागास प्रवर्ग राखीव मतदार संघ
दामू टकले 4136
हे सर्व गोरेश्वर ग्रामीण बिगर शेती सहकारी संस्थेच्या पंचवार्षिक सर्वसाधारण निवडणुकीत विजयी झाले आहेत.
