माजलगाव / नगर सह्याद्री : मनोज जरांगे यांनी आरक्षणासाठी मोठा लढा दिला. त्यांना यात यशही मिळाले. यानंतर अनेक ओबीसी नेत्यांनी सावध प्रतिक्रिया दिली. दरम्यान आता एका विवाह सोहळ्यात माजी मंत्री पंकजा मुंडे आणि मराठा आरक्षणाचे नेते मनोज जरांगे पाटील एकत्र आले हाेते.
माजी मंत्री आरोग्य मंत्री राजेश टोपे, मनोज जरांगे, पंकजा मुंडे यांची शेजारी शेजारी बसण्याची व्यवस्था केली होती. यावेळी पंकजा मुंडे यांनी जरांगे यांचे ‘आपला ओबीसीत समावेश झाला असून तुमचे स्वागत आहे,’ अशा पद्धतीने स्वागत केले.
प्रथमच पंकजा मुंडे आणि जरांगे समोरासमोर आल्याने त्यांच्यात कोणता संवाद होईल अशी सर्वांना उत्सुकता लागलेली होती. मुंडे आणि जरांगे या दोन नेत्यांची पहिली भेट कशी होणार, दोघांत काय संवाद होणार याकडे सर्वांचे लक्ष होते. ‘ओबीसीत स्वागत आहे’ असे पंकजा यांनी जरांगे यांचे स्वागत करताच उपस्थित नागरिकांनी टाळ्यांचा कडकडाट केला. जरांगे पाटील यांनीही स्मितहास्य करत दाद दिली.
मराठा-ओबीसीत वितुष्ट करणाऱ्यांना आळा बसेल
माजी मंत्री पंकजा मुंडे यांनी अध्यादेश निघताच सकारात्मक प्रतिक्रिया दिली होती. त्या म्हणाल्या , गेल्या काही महिन्यापासून महाराष्ट्र अत्यंत तणावपूर्ण वातावरणातून जात आहे. मराठा आणि ओबीसी समाजात वितुष्ट आणू पाहताय त्या प्रवृत्तींना आपल्याला आळा घातला पाहिजे. यात संयमाची भूमिका घेण्याचा मी वेळोवेळी प्रयत्न केला. सरकारने अध्यादेश काढलाय. सर्वसंमतीने अध्यादेश निघालेला असावा असे त्या म्हणाल्या.
