नवी दिल्ली-
नव्याने मंजूर केलेले फौजदारी कायदे लागू करण्याची अधिसूचना २६ जानेवारीपूर्वी जारी करण्यात येईल, अशी माहिती सूत्रांनी दिली. या कायद्यांच्या अंमलबजावणीसाठी पोलिस अधिकारी, तपास यंत्रणा आणि न्यायवैद्यक संस्थांतील अधिकार्‍यांना प्रशिक्षण देण्यात येणार असल्याचे सांगण्यात आले.
ब्रिटिश काळापासून असलेले भारतीय न्यायसंहिता, फौजदारी दंडसंहिता आणि साक्षीदार कायद्यांऐवजी भारतीय न्यायसंहिता, भारतीय नागरिक सुरक्षा संहिता आणि भारतीय साक्ष्य अधिनियम असे तीन कायदे संसदेने मंजूर केले आहेत.
राष्ट्रपती द्रौपदी मुर्मू यांनी २५ डिसेंबरला या तिन्ही विधेयकांवर सह्या केल्या आहेत. या कायद्यांची योग्य पद्धतीने अंमलबजावणी व्हावी, वेगात व पुराव्यांवर आधारित तपास व्हावा, खटल्यांसाठीचा वेळ कमी व्हावा, यासाठी पोलिसांना प्रशिक्षण देण्याचा हेतू आहे.
या प्रशिक्षणासाठी वेगवेगळ्या क्षेत्रांतील तीन हजार अधिकार्‍यांची नियुक्ती करण्यात आली आहे. वर्षभरात ९० टक्के अपेक्षित अधिकारी-कर्मचार्‍यांना प्रशिक्षण देण्याचा प्रयत्न आहे, असेही अधिकार्‍यांकडून सांगण्यात आले. न्यायसंस्थेतील प्रशिक्षणासाठी केंद्रीय गृहमंत्रालय चर्चा करत असून, भोपाळ येथील अकादमीमध्ये हे प्रशिक्षण होईल.
