अहमदनगर। नगर सहयाद्री-
प्रोफेसर चौकात मैत्रिणीबरोबर कॅफेतून बाहेर आल्यावर अज्ञात चौघांनी युवकाचे अपहरण करून त्याला कल्याण महामार्गावर नेऊन दांडयाने व कोयत्याने मारहाण केल्याची घटना सोमवारी सायंकाळी घडली.
सलमान फारुक शेख (वय २२, रा. सर्जेपुरा) असे जखमीचे नाव आहे. त्याने दिलेल्या फिर्यादीवरून अनोळखी व्यक्तींविरोधात तोफखाना पोलिस ठाण्यात गुन्हा दाखल केला आहे. सलमान तिच्या मैत्रिणीबरोबर प्रोफेसर चौक येथे नाष्टा करण्यास गेला होता. तेथील कॅफेच्या बाहेर येत असताना एका अनोळखी व्यक्तीने फोन करून इतरांना बोलवून घेतले.
चौघांनी त्याला मारहाण केली व तुला पोलिस स्टेशनला नेतो, असे म्हणून जबरदस्ती दुचाकीवर बसवून कल्याण रोडने पुलाच्या पुढे नेले. तेथे आणखी सहा ते सात अनोळखी व्यक्ती उभ्या होत्या. या सर्वांनी त्याला लाकडी दांडयाने व कोयत्याने मारहाण केली. तसेच मोबाईल व दोन हजार रुपये काढून घेत काट्यात टाकून दिल्याचे फिर्यादीत म्हटले आहे.
