अहमदनगर । नगर सहयाद्री:-
नगर-मनमाड राज्य मार्गावर कारचा आणि ट्रकचा भीषण अपघात झाल्याची घटना घडली आहे. या अपघातात पती-पत्नी ठार झाले आहे. दीपक गोविंद म्हसे, व पत्नी माया गोविंद म्हसे दोघे ( रा , ममदापुर, ता. राहता, जि. अहमदनगर) असे अपघातात मृत झालेल्यांची नावे आहेत.
सदरची घटना आज शुक्रवार दि. ११ रोजी सकाळच्या सुमारास घडली आहे. राहता तालुक्यातील ममदापुर येथील म्हसे दाम्पत्य मेव्हण्याच्या दशक्रिया विधीसाठी चार चाकी वाहनाने निघाले होते. दरम्यान नगर-मनमाड राज्य मार्गावरील राहुरी फॅक्टी येथील सेल पेट्रोल पंपाजवळ भरधाव मालवाहुक ट्रकने त्याच्या चार चाकी वाहनाला जोरदार धडक दिली. या भीषण अपघातात म्हसे दाम्पत्याचा मृत्यू झाला आहे. तर कारचा अक्षरशः चक्काचूर झाला आहे.अपघाताची बातमी समजताच स्थानिक नागरिकांनी गर्दी केली. नागरिकांच्या मदतीने अपघातग्रस्त गाडीतुन मृतदेह बाहेर काढण्यात आले.
नगर-मनमाड रस्त्याचे काम धीम्या गतीने सुरु आहे. तसेच एकेरी वाहतूक सुरु आहे. त्यामुळे पुन्हा एकदा नगर मनमाड रस्त्याने पती-पत्नीचा बळी घेतला असून संबंधित ठेकेदाराविरोधात गुन्हा दाखल करण्याची मागणी स्थनिक नागरिकांनी केली आहे. घटनेची माहिती मिळताच पोलिसांनी घटनासाठी धाव घेतली असून पुढील तपास सुरु आहे.
