Politics News: विधानसभा निवडणुकीच्या पार्श्वभूमीवर नांदेडमध्ये काँग्रेसला मोठा धक्का बसण्याची शक्यता आहे. कारण आणखी एक काँग्रेसचा आमदार भाजपमध्ये जाण्याची शक्यता आहे. कारण काँग्रेसचे आमदार मोहन हंबर्डे यांनी केंद्रीय मंत्री नितीन गडकरी यांची भेट घेतल्याने त्यांचा भाजपमध्ये प्रवेश होणार अशी चर्चा सुरु झाली आहे.
मोहन हंबर्डे यांनी काल मध्यरात्री केंद्रीय मंत्री नितीन गडकरी यांची भेट घेतली आणि त्यामुळे राजकीय वर्तुळात त्यांच्या भाजपमध्ये सामील होण्याच्या चर्चेला उधाण आले आहे. लवकरच ते भाजपमध्ये प्रवेश करणार असल्याचं बोललं जात आहे. हा काँग्रेससाठी मोठा धक्का मानला जात आहे.
कारण, काही दिवसांपूर्वी देगलूरचे आमदार जितेश अंतापूरकर यांनी भाजपमध्ये पक्ष प्रवेश केला आहे. त्यानंतर आता मोहन हंबर्डे हे देखील भाजपमध्ये जाण्याची शक्यता आहे. त्यांच्यावर सुद्धा क्रॉस वोटिंगचा आरोप केला आहे. त्यामुळं हंबर्डे देखील भाजपच्या वाटेवर आहेत की काय अशी चर्चा सध्या नांदेड जिल्ह्यात सुरू आहे.
