मुंबई । नगर सहयाद्री:-
राज्यातील विधानसभा निवडणुकीत महायुतीला स्पष्ट बहुमत मिळाले, पण आता मुख्यमंत्रीपदावरुन पेच झालाय. १३२ जागा जिंकणाऱ्या भाजपला मुख्यमंत्रीपद हवेय. तर सुरवातीला ५७ जागा असणाऱ्या शिंदेंच्या शिवसेनेने मुख्यमंत्रीपदासाठी आग्रही धरला होता.
त्यामुळे राज्याला नवा मुख्यमंत्री कोण मिळणार? याबाबत तक्र वितर्क लढवले जात आहे. १३७ आमदारांचे पाठबळ देवेंद्र फडणवीस यांना पाठबळ असल्यामुळे तेच मुख्यमंत्री होतील, असा स्पष्ट संदेश एकनाथ शिंदे यांना देण्यात आला होता. त्यानंतर त्यांनी देखील एक नवा प्रस्ताव महायुतीपुढे ठेवल्यामुळे पेच निर्माण झाला आहे.
‘द न्यू इंडियन एक्स्प्रेस’ या वृत्त्तपत्राच्या वृत्तानुसार, भाजपकडून एकनाथ शिंदे यांना मुख्यमंत्रिपद सोडण्याच्या मोबदल्यात केंद्रात महत्त्वाच्या खात्याचे मंत्रीपद किंवा राज्यात उपमुख्यमंत्रीपद देण्याची ऑफर दिली होती. मात्र, एकनाथ शिंदे यांनी या दोन्ही ऑफर्स नाकारल्या आहेत. त्याऐवजी एकनाथ शिंदे यांनी एक नवा प्रस्ताव भाजपसमोर ठेवला आहे. मला राज्यात मुख्यमंत्रीपद मिळणार नसेल तर मला महायुती सरकारचा संयोजक हे पद द्यावे.
कारण राज्यातील विधानसभा निवडणूक ही माझ्या नेतृत्त्वाखाली लढवण्यात आली होती, असे एकनाथ शिंदे यांचे म्हणणे आहे. तसेच आपला मुलगा आणि खासदार श्रीकांत शिंदे यांना राज्यात उपमुख्यमंत्रीपद देण्यात यावे, अशी मागणी एकनाथ शिंदे यांनी केली आहे. एकनाथ शिंदे यांच्या या मागणीने भाजप आणि महायुतीचे नेते बुचकाळ्यात पडले असून एकनाथ शिंदे यांच्या ऑफरबाबत आता भाजपच्या थिंक टँकमधील नेते काय निर्णय घेतात, हे महत्वाचे ठरणार आहे.
