वैजापूर / नगर सह्याद्री : अनेक ठिकाणी चोरट्यांचा धुडगूस सुरु असल्याच्या बातम्या येत असतात. आता एक धक्कादायक बातमी समोर आली आहे.
कुटुंबास मारहाण करत हजारो रुपये लांबवले असल्याची घटना घडली आहे. धक्कादायक म्हणजे दरोडेखोरांना पकडण्यास गेलेल्या पोलिसांवर दरोडेखोरांनी प्राणघातक हल्ला केला. वैजापूर तालुक्यातील शिऊर पोलीस ठाणे हद्दीत व मनेगाव शिवारात ही खळबळजनक घटना घडली आहे.
अधिक माहिती अशी : विष्णू पंढरीनाथ सुराशे (वय 50 वर्षे) हे त्यांच्या पत्नी हिराबाई व मुलगा रुपेश यांच्यासह मनेगाव शिवारातील शेतवस्तीवर राहतात. रात्री 11 वाजता त्यांचा मुलगा रुपेश याच्या ओरडण्याचा आवाज ऐकू आल्याने ते उठले. त्यांनी समोरील घटना पाहिली असता त्यांनाही मारहाण करण्यात आली. त्यांच्या पत्नीच्या अंगावरील दागिने चाकूचा धाक दाखवून चोरून नेले. त्यानंतर त्यांनी शिऊर पोलीस ठाण्यात धाव घेत गुन्हा दाखल केला.
दरम्यान या गुन्ह्याचा तपास करत असताना स्थानिक गुन्हे शाखेच्या पथकाला गुन्ह्यातील आरोपी जानेफळ शिवारात एका शेतात लपून असल्याची माहिती मिळाली. या माहितीच्या अनुषंगाने स्थानिक गुन्हे शाखेचे पथक जानेफळ शिवारातील बिबटे वस्ती येथे पोहचले. त्यांना बघताच चोरटयांनी त्यांच्यावर दगडफेक केली.
पोलिसांनी शिताफीने त्यांना पकडण्याचा प्रयत्न केला. तेव्हा चोरट्यांनी त्यांच्यावर धारधार शस्त्राने हल्ला केला. या हल्ल्यात उपनिरीक्षक दुल्लत, पोलिस हेड कॉन्स्टेबल वाल्मीक निकम, व संजय घुगे हे जखमी झाले आहे. या प्रकरणी पोलिसांनी अद्याप सहाजणांना ताब्यात घेतले आहे.
