गुजरात / नगर सह्याद्री : शाळेच्या विद्यार्थ्यांनी भरलेली बोट नदीत बुडाल्याची मोठी घटना घडली आहे. यात 12 विद्यार्थी आणि 2 शिक्षक असा 14 जणांचा मृत्यू झाला आहे. ही घटना गुजरातमध्ये घडली आहे.
या बोटीमध्ये खासगी शाळेचे एकूण 27 विद्यार्थी असून या विद्यार्थ्यांनी कोणतेही लाईफ जॅकेट परिधान केलेले नसल्याचे समोर आले आहे. बोट उलटल्याच्या घटनेनंतर मुख्यमंत्र्यांनी आपल्या ट्वीटर अकाऊंटद्वारे सहवेदना व्यक्त केली आहे.
वडोदऱ्याच्या हरणी जिल्ह्यात बोट पलटून मुले बुडाल्याची घटना घडली आहे. ही अत्यंत हृदय विदारक घटना आहे. प्राण गेलेल्या विद्यार्थ्यांच्या आत्म्याला शांती मिळावी यासाठी मी प्रार्थना करत आहे. या दु:खद प्रसंगी मी त्यांच्या परिवाराच्याप्रति सहवेदना व्यक्त करत आहे.
ईश्वर त्यांना हे दु:ख सहन करण्याची ताकद देवो, असे मुख्यमंत्री म्हणाले. घटनास्थळी बोटीत बसलेल्या विद्यार्थी आणि शिक्षकांच्या बचावाचे कार्य सुरु आहे. तसेच जखमी झालेल्यांना तात्काळ उपचारासाठी नेण्याचे निर्देश देण्यात आले आहेत.
