अहमदनगर | नगर सह्याद्री-
सैनिकाच्या पत्नी विषयी समाजात वाईट बोलून त्यांची बदनामी केली. याबाबत जाब विचारण्यास गेलेल्या सैनिकाला मारहाण करण्यात आली. गुरूवारी (दि. ३०) रात्री साडे आठच्या सुमारास सावेडी उपनगरात हा प्रकार घडला. या प्रकरणी सैनिकाच्या पत्नीने तोफखाना पोलीस ठाण्यात फिर्याद दिली असून पोलिसांनी तिघांविरोधात विनयभंग, मारहाण कलमान्वये गुन्हा दाखल केला आहे.
जाकीर पत्रकार, त्याची पत्नी (पूर्ण नावे माहिती नाही, रा. तपोवन रस्ता) व एका मुलीविरोधात हा गुन्हा दाखल झाला आहे. फिर्यादी यांचे पती सैन्य दलात नोकरीला आहेत. ते नोकरीच्या ठिकाणी वास्तव्यास असतात. फिर्यादी, त्यांची मुलगी व आई उपनगरात राहतात. फिर्यादीच्या पतीला सुट्टी असल्याने ते घरी आले आहेत. जाकीर पत्रकार हा फिर्यादी विषयी समाजात नेहमी वाईट बोलत असतो. बर्याच वेळा त्यांचा घरापर्यंत पाठलाग करून त्यांच्या विषयी चौकशी करत असतो.
याबाबत फिर्यादी यांनी त्यांच्या पतीला फोनवरून माहिती दिली होती. गुरूवारी रात्री साडेआठच्या सुमारास फिर्यादी कुटुंबासह कामानिमित्त बाहेर जात असताना त्यांनी त्यांचे वाहन थांबवून जाकीर पत्रकार याला जाब विचारला. त्याचा राग आल्याने जाकीर पत्रकार याच्यासह तिघांनी फिर्यादीच्या पतीला मारहाण केली. फिर्यादीसह मुलीला शिवीगाळ करत जिवे मारण्याची धमकी दिल्याचे फिर्यादीत म्हटले आहे. पोलीस अधिक तपास करीत आहेत.
